युवा तथा खेलकुद मन्त्री समेत भइसक्नु भएका नेपाली कांग्रेसका नेता राजेन्द्र कुमार केसीको जन्म २०१५ सालको असार २८ गते काठमाण्डौको कीर्तिपुर नगरपालिकामा भएको हो । पदमबहादुर र टोलकुमारी केसीका छोरा राजनले अर्थशास्त्रमा स्नातकोत्तर गर्नुभएको छ ।
२०४६ सालको जनआन्दोलनपछि राजनीतिमा सक्रिय हुनु भएका केसी २०४९ सालमा चोभार गाविसको अध्यक्षमा विजयी बन्नुभयो । २०५४ सालमै उहाँ जिल्ला विकास समिति काठमाडौंको सदस्य बन्नुभयो । २०५४ सालकै स्थानीय चुनावमा नगर समितिको सभाषदमा विजयी हुनुभयो ।
२०५१ र २०५६ सालमा पार्टीको क्षेत्रीय सभापति भएका केसी ४ पटक महासमिति सदस्य भैसक्नु भएको छ ।
२०६४ सालको संविधानसभा चुनावमा उहाँ काठमाण्डौ १० बाट माओवादी अध्यक्ष पुष्पकमल दाहाल प्रचण्डसँग पराजित हुनुभएको थियो । तर २०७० सालको चुनावमा भने यही क्षेत्रबाट माओवादी अध्यक्ष प्रचण्डलाई नै पराजित गर्नुभएको थियो । यस्तै २०७४ सालको संघीय चुनावमा पनि उहाँले वाम गठबन्धनका हितमान शाक्यलाई २ हजार २ सय ८३ मतले पराजित गर्नुभयो ।
