नेकपा एकीकृत समाजवादीका नेता जीवनराम श्रेष्ठको जन्म २०२२ साल साल पुस १५ गते काठमाडौंको स्वयम्भूमा भएको हो । आमा वसन्तमाया र बुबा कृष्णरामका छोरा उहाँले व्यवस्थापनमा स्नातक गर्नुभएको छ ।
१४ वर्षको उमेरदेखि नै राजनीतिमा होमिएका जीवनराम ०३६ सालको विद्यार्थी आन्दोलनबाट प्रभावित हुनुभएको थियो । त्यसै बेलादेखि भूमिगत नेकपा मालेको सम्पर्कमा पुग्नुभएका उहाँले क्रमश: पार्टीको वडा, नगर, इलाका, जिल्ला र उपत्यकाको नेतृत्व पूरा गर्नुभयो ।
२०४३ सालमा काठमाण्डौ वडा नम्बर १५ मा पार्टी सचिवका रुपमा जिम्मेवारी लिएर पञ्चायत व्यवस्था विरोधी आन्दोलनमा सक्रिय हुनुभएका उहाँ २०४७ सालमा प्रजातान्त्रिक राष्ट्रिय युवा संघको स्थापनादेखि नै सक्रिय हुनुभयो ।
प्ररायुसंघको नगर र जिल्लाको नेतृत्व गर्दै ०४८ सालमा एमाले पार्टीको केन्द्रीय सदस्य निर्वाचित हुनुभयो । ०४९ सालमा काठमाण्डौ वडा नम्बर १५ का वडाध्यक्ष निर्वाचित भएर जिम्मेवारी पूरा गरेका उहाँ २०५३ सालमा राष्ट्रिय खेलकूद परिषदको सदस्य सचिव हुनुभयो । ०६३ सालमा पुन: दोस्रो पटक पनि उहाँ सदस्य सचिव हुनुभयो ।
नेपाल ओलम्पिक कमिटीको महासचिव, नेपाल स्की संघका अध्यक्ष, ओलम्पिक कमिटीका अध्यक्षसमेत भइसक्नु भएका उहाँले २०७४ सालमा काठमाण्डौ क्षेत्र नम्बर ८ बाट संसदीय चुनाव जित्नु भएको हो । अहिले उहाँ शेर बहादुर देउवाको मन्त्रीमण्डलमा संस्कृति, पर्यटन तथा नागरिक उड्डयन मन्त्री हुनुहुन्छ ।
