नेपाली कांग्रेसका पूर्व महामन्त्री एवम् केन्द्रीय सदस्य शशांक कोइराला बीपी कोइरालाका छोरा हुनुहुन्छ । उहाँको जन्म २०१५ सालको असोजमा भएको हो ।
विद्यालय तहको शिक्षा सिनियर क्याम्ब्रिज स्कुल दार्जिलिङबाट लिएका नेता कोइरालाले त्यसपछिको शिक्षा भारतको काशी हिन्दु विश्वविद्यालय बनारसबाट लिनुभएको हो । बनारसबाट बिएस्सी सम्मको शिक्षा लिएका कोइरालाले काशी हिन्दु विश्वविद्यालयबाटै एमबीबीएससम्मको शिक्षा लिनुभएको छ ।
अहिले काठमाण्डौको टोखामा बसोबास गर्दै आउनुभएका नेता शशांक कोइरालाले २०२४ सालबाट नेपाली कांग्रेसको राजनीति सुरु गर्नुभएको हो । २०२४ सालमा उहाँ भारतको बनारसमा नेपाली विद्यार्थीको छात्र संघको सदस्य बन्नुभएको थियो ।
२०६४ र २०७० सालको संविधानसभा चुनावमा नवलपरासीबाट चुनिनुभएका शशांक कोइराला २०७४ सालको संसदीय चुनावमा पनि विजयी हुनुभयो । उहाँ अहिलेसम्म मन्त्री बन्नुभएको छैन । यस पटक पनि नवलपरासी पूर्व क्षेत्र नं. १ बाट उम्मेदवार बन्नु भएको छ ।
२०७२ सालमा पार्टीको १३ औँ महाधिवेशनबाट महामन्त्रीमा निर्वाचित हुनुभएका कोइराला १४ महाधिवेशनबाट भने केन्द्रीय सदस्यमा खुलातर्फबाट विजयी हुनुभयो ।
