एमालेको नवौं महाधिवेशनबाट केन्द्रीय सदस्य हुनुभएका नेता सोमप्रसाद पाण्डेयको जन्म २०१६ सालको असारमा पाल्पाको मदनपोखरामा भएको हो । उहाँले त्रिभुवन विश्वविद्यालय काठमाण्डौबाट कानुनमा स्नातक तह उत्तीर्ण गर्नुभएको छ । शारदा मावि मदनपोखराबाट एसएलसी दिनुभएका पाण्डेयले २०४४ सालमा दमकडा पाल्पामा अध्यापन समेत गराउनु भएको थियो ।
२०२७ सालदेखि उहाँले राजनीति सुरु गर्नु भएको हो । माक्र्सवादी हुँदै माले र पार्टी एकतापछि एमालेमा रहनुभएका पाण्डेय २०५१ सालमा पहिलोपटक सांसदमा निर्वाचित हुनुभएको थियो । ५ वर्षपछि २०५६ सालमा भएको प्रतिनिधि सभाको चुनावमा पनि पाण्डे पाल्पा क्षेत्र नम्बर २ बाटै निर्वाचित हुनुभयो । २०६४ सालको पहिलो संविधानसभाको चुनावमा पराजित भएका पाण्डेय २०७० सालको चुनावमा भने यही क्षेत्रबाट विजयी हुनुभयो । चुनाव जितेपछि २०७२ सालमा उहाँले उद्योगमन्त्रीको जिम्मेवारी पनि पाउनुभएको थियो । फेरि २०७४ को प्रतिनिधि सभा चुनावमा पनि उहाँ यही क्षेत्रबाट विजयी हुनुभयो ।
वि.स.२०५१ सालमा नेपाल वार एसोशिएसनको अध्यक्ष बन्नुभएका पाण्डे २०५६ सालमा एमाले जिल्ला कमिटी सदस्य हुँदै नेकपा एमाले पाल्पाको इन्चार्जसमेत हुनुभयो । अहिले एमाले विभाजनपछि उहाँ एकीकृत समाजवादीमा हुनुहुन्छ । उहाँ नेकपा एकीकृत समाजवादीका अध्यक्ष तथा वरिष्ठ नेता माधव नेपालका सम्धी पनि हुनुहुन्छ । पाण्डेको हालको बसाई काठमाडौंको नयाँ बानेश्वरमा छ ।
