काठमाण्डाै – सार्वजनिक पदमा बसेका व्यक्तिको सम्पत्ति छानबिनका लागि नेपाली कांग्रेसले प्रतिनिधि सभामा सार्वजनिक महत्त्वकाे प्रस्ताव दर्ता गरेको छ ।

कांग्रेसका सांसद धनराज गुरुङ, सहमहामन्त्रीद्वय बद्री पाण्डे र जीवन परियारले सार्वजनिक पदधारण गरेका व्यक्ति र उनीहरूका परिवारको सम्पत्ति छानबिन गर्नेपर्ने विषयबारे आज प्रतिनिधि सभामा सार्वजनिक महत्त्वकाे प्रस्ताव दर्ता गराएका हुन् ।

गएको शुक्रवार दर्ता भएको प्रस्तावमा सुशासन कायम गर्नका लागि सार्वजनिक पदमा रहेका व्यक्तिहरूको सम्पत्ति छानबिन गर्नुपर्ने विषयमा छलफल माग गरिएको छ ।

‘विक्रम संवत् २०४७ सालदेखि विभिन्न पदमा बहाल रहेका र अवकाश प्राप्त पदाधिकारीहरूको सम्पत्ति जाँचबुझ गरी रायसहितको प्रतिवेदन पेस गर्न २०५८ साल फागुन २४ गते न्यायिक जाँचबुझ आयोग गठन गरिएको थियो । आयोगले जाँचबुझ गरी पेस गरेको प्रतिवेदन सार्वजनिक गरी कार्यान्वन गर्नु आवश्यक छ’, प्रस्तावमा भनिएको छ ।