काठमाण्डौ – गण्डकी प्रदेशमा सभामुखको समेत हस्ताक्षर गराएर नेकपा एमालेका खगराज अधिकारी मुख्यमन्त्रीमा नियुक्त भएको भन्दै नेपाली कांग्रेसले सर्वोच्च अदालतमा रिट दिएको छ ।

एमालेका अधिकारीको नियुक्ति बदर गरी आफूलाई मुख्यमन्त्री पदमै निरन्तरताका लागि अन्तरिम आदेशसहितको परमादेश जारी गर्न माग गर्दै कांग्रेसका सुरेन्द्रराज पाण्डेले आज सर्वोच्च अदालतमा रिट दिनुभएको हो ।

सभामुख कृष्ण धितालको समेत हस्ताक्षर भए पनि प्रदेश प्रमुख डिल्लीराज भट्टले एमालेका अधिकारीलाई मुख्यमन्त्री नियुक्त गर्नु असंवैधानिक भएको निवर्तमान मुख्यमन्त्री पाण्डेको दाबी छ ।

अस्ति आइतवार एमालेका २२, माओवादीका सभामुखसहित आठ र स्वतन्त्र सांसद राजीव गुरुङ (दीपक मनाङे) सहितको समर्थनमा दाबी पेस गरेपछि प्रदेश प्रमुख भट्टले अधिकारीलाई मुख्यमन्त्री नियुक्त गर्नुभएको थियो ।