काठमाण्डौ – राष्ट्रिय स्वतन्त्र पार्टी जनस्तरका सामुदायिक सङ्घ–संस्थाको नेतृत्व छनौटमा दलीय प्रतिस्पर्धा नगर्न नेता/कार्यकर्तालाई निर्देशन दिएको छ । केही ठाउँका खानेपानी समिति, उपभोक्ता समिति लगायतमा रास्वपाका व्यक्ति निर्वाचित भएको खबर आएका थिए।

आज रास्वपाले विज्ञप्ति निकालेर विद्यालय, खानेपानी, सिँचाइ, वनजस्ता सामुदायिक संस्थाको उपभोक्ता/व्यवस्थापन समिति तथा विकास निर्माणसँग सम्बन्धित स्थानीयस्तरका समितिमा राजनीतिक भागबण्डा वा दलीय प्रतिस्पर्धाका आधारमा नेतृत्व छनोट गरिनु सर्वथा गलत भएको जनाएको छ।

रास्वपाले पार्टीको संस्थागत प्रतिनिधित्वका रूपमा प्रचारप्रसार नगर्न, सामूहिक रूपमा प्यानल बनाउन, सगोलमा भोट नमाग्न तथा अन्य दलहरूसँग राजनीतिक अभिप्रायले समूह बनाएर विरोध, समर्थन, वक्तव्य नगर्न/नगराउन अनुरोध गरेको छ।

पार्टीको नीति विपरीत क्रियाकलाप गरेको पाइएमा कडा कारबाही गर्ने पनि रास्वपाले चेतावनी दिएको छ ।