काठमाण्डाै – कोशी करिडोर दुई सय २० किलोभोल्ट प्रसारण लाइन आयोजनाअन्तर्गत सङ्खुवासभाको धर्मदेवी नगरपालिकामा रहेको वसन्तपुर सबस्टेशनबाट ताप्लेजुङको मैवाखोला गाउँपालिकामा रहेको ढुङ्गेसाँघु सबस्टेशनसम्मको प्रसारण लाइनको पहिलो सर्किट निर्माण सम्पन्न भएको छ ।

तमोर नदी तथा तमोरका सहायक खोलानालाहरूमा निर्माण भएका र हुने जलविद्युत् आयोजनाहरूको बिजुली राष्ट्रिय प्रसारण प्रणालीमा समाहित गर्न वसन्तपुर–ढुङ्गेसाँघु २२० केभी डबल प्रसारण लाइन निर्माण गरेको नेपाल विद्युत् प्राधिकरणले जनाएको छ । ३५ किलोमिटर लामो प्रसारण लाइनमा एक सय २७ वटा टावर निर्माण गरिएका छन् ।

प्रसारण लाइन निर्माणले ताप्लेजुङमा निर्माण सम्पन्न हुने चरणमा रहेको ७३ मेगावाटको मध्य तमोर जलविद्युत् आयोजनाको बिजुली प्रवाहमा सहज भएको प्राधिकरणका कार्यकारी निर्देशक कुलमान घिसिङले जानकारी दिनुभयो । अरुण तथा तमोर नदी र त्यसका सहायक खोलानालामा निर्माण हुने र भइरहेका जलविद्युत् आयोजनाहरूबाट उत्पादित बिजुली कोशी करिडोर २२० केभी प्रसारण लाइनमार्फत इनरुवा सबस्टेशनमा जोडिने छ ।