नेकपा एमालेका अध्यक्ष केपी शर्मा ओलीको जन्म २००८ साल फागुन ११ गते तेह्रथुम जिल्लाको इवागाउँमा भएको हो । उहाँका बाबुको नाम मोहनप्रसाद ओली र आमाको नाम मधु ओली हो । उहाँ २०७२ असोज २४ गते पहिलोपटक प्रधानमन्त्रीको रूपमा निर्वाचित हुनुभएको थियो । २०७४ सालको प्रतिनिधि सभाको चुनावपछि ओली २०७४ फागुन ३ मा दोस्रोपटक प्रधानमन्त्रीमा नियुक्त हुनुभएको थियो । त्यसअघि २०६४ देखि २०६५ सम्म ओली उपप्रधान एवम् परराष्ट्र मन्त्री हुनुभयो ।
२०२२ सालमा कम्युनिष्ट राजनीतिमा लागेका ओलीले २०२६ सालमा नेकपाको सदस्यता लिनु भएको थियो । २०२८ सालको झापा आन्दोलनका प्रमुखमध्ये उहाँ एक हुनुहुन्थ्यो । त्यही वर्ष उहाँ जेल पर्नुभयो । ओली तत्कालीन नेकपा मालेको संस्थापक नेता समेत हुनुहुन्छ । पञ्चायती व्यवस्थाविरुद्धको संंघर्षका क्रममा ओलीले २०२८ देखि २०४४ सम्म १४ वर्ष जेल जीवन बिताउनु भएको थियो ।
ओली २०४८, २०५१ र २०५६ को आमनिर्वाचनमा झापा जिल्ला क्षेत्र नं ६ बाट प्रतिनिधि सभामा निर्वाचित हुनुभएको थियो । पहिलो संविधान सभा निर्वाचन २०६४ मा भने उहाँ झापाको क्षेत्र नं ७ बाट पराजित हुनुभयो । दोश्रो संविधानसभा निर्वाचन २०७० मा उहाँ झापा क्षेत्र नं ७ बाट निर्वाचित हुनुभयो । २०७४ सालमा उहाँ झापा ५ बाट निर्वाचित हुनु भएको थियो । यस पटक पनि उहाँ झापा ५ बाट नै उम्मेदवार हुनुभएको छ ।
उहाँ २०६५ मा भएको नेकपा एमालेको आठौँ महाधिवेशनमा झलनाथ खनालसँग अध्यक्षमा पराजित हुनुभएको थियो । २०७० साल माघ २१ गते झलनाथ खनाललाई पराजित गरेर उहाँ संसदीय दलको नेतामा चयन हुनुभयो । २०४९ सालमा नेकपा एमालेको स्थायी कमिटी सदस्य हुनुभएका ओली २०७१ असारमा पार्टीको अध्यक्षमा निर्वाचित हुनुभयो ।
२०७४ सालको चुनावपछि तत्कालीन एमाले र माओवादीको एकता हुँदा उहाँ नेकपाको पहिलो अध्यक्षका रुपमा चयन हुनुभयो । अर्का अध्यक्ष पुष्पकमल दाहाल प्रचण्ड पनि हुनुहुन्थ्यो । सरकार र पार्टी सञ्चालनको विषयमा नेतृत्वबीच विवाद बढिरहेको बेला सर्वोच्चले नेकपा नै बिघटन गरिदिएपछि फेरि उहाँ एमालेकै अध्यक्ष बन्नुभयो । २०७८ मंसिरमा भएको पार्टीको १० औं महाधिवेशनबाट उहाँ फेरि एमालेको अध्यक्षमा सर्वसम्मत चयन हुनुभएको छ ।
झापामा विद्यालय जीवन सुरु गरेर ओलीले कक्षा ४ सम्मको अध्ययन गाउँमा पूरा गर्नु भएको थियो । ओलीले झापाको आदर्श माध्यमिक विद्यालयबाट २०२८ सालमा प्रवेशिका परीक्षा एसएलसी उत्तीर्ण गर्नु भएको थियो । भाषण गर्दा उखान–टुक्कालाई प्रयोग गर्ने बानीका कारण उहाँको भाषण धेरैले रुचाउँछन् । ओली हाल भक्तपुरको बालकोटमा बस्दै आउनु भएको छ ।
