पृथ्वी सुब्बा गुरुङको जन्म वि.स.२०१४ साल फागुन १ गते लमजुङ जिल्लामा पर्ने साविकको गिलुङ गाविस–८ टक्सारमा भएको हो । नेकपा एमालेको उपमहासचिव पृथ्वीसुब्बा गुरुङ गण्डकी प्रदेशको पहिलो मुख्यमन्त्री हुनुहुन्छ । २०७८ जेठ २७ मा प्रदेश सभाको विश्वासको मत पाउन नसकेपछि सुब्बा पदमुक्त हुनुभएको थियो । उहाँ नेकपा एमालेका सचिव समेत रहिसक्नुभएको छ ।
विज्ञानमा स्नातक गर्नुभएका गुरुङ पञ्चायतकालमै २०३४ सालदेखि राजनीतिमा होमिनुभएको थियो । सुरुमा शिक्षण पेशामा आबद्ध उहाँ त्यहीँबाट राजनीतिमा लाग्नुभयो । शिक्षणमै हुँदा आन्दोलनमा उत्रेकाले उहाँ पटक–पटक पञ्चायतकालमै प्रहरी हिरासतमा पनि पर्नुभयो । २०४० मंसिरमा उहाँ नेपाल राष्ट्रिय शिक्षक सङ्गठनको जिल्ला अध्यक्षमा निर्वाचित हुनुभयो । वि.स.२०६२–६३ को जनआन्दोलनपछि २०६४ सालमा भएको पहिलो संविधानसभा निर्वाचनमा लमजुङ क्षेत्र नम्बर २ बाट उहाँ प्रतिनिधि सभामा विजयी हुनुभयो ।
त्यसपछि गिरिजाप्रसाद कोइराला नेतृत्वको सरकारमा संस्कृति, पर्यटन तथा नागरिक उड्ययन मन्त्री पनि बन्नुभयो । गुरुङमाथि अशोक राई नेतृत्वको सङ्घीय समाजवादी पार्टीमा जान खोजेको आरोप पनि लागेको थियो । तर गुरुङ भने यी आरोपबीच एमालेमै रहेर आफ्नो राजनीतिक यात्रामा अघि बढिरहनुभयो ।
