दाङ, लक्ष्मीपुरकी शान्ता चौधरी २५ वर्षसम्म जमिनदारको घरमा कमलरी बनेपछि विद्रोह गरेर राजनीतिमा उदाएकी साहसी महिलाको रुपमा चिनिनुहुन्छ । उहाँ नेपालको पहिलो संविधानसभा सदस्य पनि हुनुहुन्थ्यो ।
आफू कमलरीबाट उम्किएपछि उहाँले अरु १७ जना कमलरीलाई आफैले मुक्त गराई शिक्षाको समेत व्यवस्था आफ्नै तर्फबाट गरिदिनुभएको थियो । दुई सन्तानकी आमा चौधरी भूमि आन्दोलनमा लाग्दा जमीन्दारले उहाँको छाप्रो जलाइदिएको थियो । त्यही भूमि अधिकार सम्बन्धी आन्दोलनमा सक्रिय भएकै बेला एमालेले उहाँलाई समानुपातिक सभासद बनाएको थियो ।
यस्तै उहाँले संविधानसभा अन्तर्गतको प्राकृतिक स्रोत साधन समितिको सभापति पदमा रहेर जिम्मवारी पनि निर्वाह गरिसक्नुभएको छ । चौधरीले सानोमा पढ्न नपाए पनि राजनीतिमा लागेपछि उहाँले ९ कक्षादेखि पढ्न सुरु गरेर १२ कक्षा उत्तिर्ण गरिसक्नुभएको छ । उहाँको आत्मकथा ‘कम्लहरीदेखि सभासद्सम्म’ प्रकाशित भइसकेको छ ।
