नेकपा एमालेमा महासचिव शङ्कर पोखरेल लुम्बिनी प्रदेशका प्रथम तथा पूर्व मुख्यमन्त्री हुनुहुन्छ । प्रदेशसभा निर्वाचन २०७४ मा त्यसबेला नेकपा एमालेका स्थायी कमिटी सदस्य पोखरेल दाङ निर्वाचन क्षेत्र नम्बर २ ‘क’ बाट निर्वाचित हुनु भएको थियो ।
दाङमा जन्मिएका उहाँ समानुपातिक तर्फबाट नेकपा एमालेका सभासद समेत हुनु भएको थियो । २०५१ सालको संसदीय निर्वाचनमा दाङ क्षेत्र नम्बर ३ बाट निर्वाचित भएका हुनु भएको थियो । उहाँ २०५६ मा पनि त्यसै क्षेत्रका उम्मेदवार हुनुहुन्थ्यो ।
विद्यार्थी आन्दोलनका कारण २०३५ सालदेखि राजनीतिमा संलग्न उहाँ पहिलोपटक २०३७ सालमा जेल पर्नु भएको थियो । पटकपटक गरी एक वर्ष जेल जीवन बिताएका पोखरेल एमालेका केन्द्रीय सदस्य तथा पार्टी सचिवालय सदस्य समेत हुनुहुन्थ्यो ।
उहाँले अनेरास्ववियु अध्यक्ष (२०४७–५०), पार्टीको राप्ती अञ्चल इन्चार्ज र उपत्यका कमिटी सचिवको जिम्मेदारी समेत निर्वाह गरिसक्नु भएको छ । त्रिभुवन विश्वविद्यालयबाट एमबीए गर्नु भएका पोखरेलका २ छोरी छन् ।
उहाँ पूर्व सञ्चारमन्त्रीसमेत हुनुहुन्छ । अर्थशास्त्रमा स्नातकोत्तर गरेका पोखरेललाई पार्टीभित्र बौद्धिक नेताका रुपमा पनि चिनिन्छ ।
विक्रम संवत २०१९ सालमा तुलसीपुर उपमहानगर वडा नम्बर १९ हाडिमेमा जन्मिएका शंकर पोखरेल २०५१ सालमा दाङ जिल्लाको क्षेत्र नम्बर २ बाट निर्वाचित भइ पहिलो पटक प्रतिनिधि सभाका सदस्य बन्नु भएको थियो ।
२०७० सालमा भएको संविधान सभाका चुनावमा दाङ जिल्लाको क्षेत्र नम्बर ४ पराजय भोग्नु भएको थियो । २०७४ सालमा भने उहाँ दाङ क्षेत्र नम्बर २ (क) बाट प्रदेश सभाको सांसद बन्नुभयो ।
कुनै बेला मदनकुमार भण्डारीसँग निकट रहेर काम गरेका पोखरेलले अनेरास्ववियुको अध्यक्ष, त्रिभुवन विश्वविद्यालयको स्ववियु सभापतिको जिम्मेवारी समेत वहन गर्नु भएको थियो । विद्यार्थी राजनीतिबाट पार्टी राजनीतिमा प्रवेश गरेका शंकर पोखरेलको वैचारिक तथा राजनीतिक क्षमता र संजठनात्मक कार्यकुशलता उदाहरणीय मानिन्छ ।
