Ujyaalo Online

देश परदेश (अडियाे)

खाडीका कुवेत र कतार हुन् वा पूर्वी एसियाका कोरिया र मलेसिया ! अथवा युरोप र अमेरिकाका देश नै किन नहुन्, अब धरतीका सातै महादेशमा नेपाली नपुगेका देश छैनन् । विदेशमा नेपालीले नगरेका काम पनि अब थोरै मात्र छन् । वैदेशिक रोजगारी, अध्ययन, अनुसन्धान, ब्यवसाय र जागीरका सिलसिलामा विदेशमा रहेका नेपालीको संख्या झण्डै ५० लाख पुगेको छ । त्यसमध्ये आधाभन्दा बढी जनशक्ति वैदेशिक रोजगारीका सिलसिलामा विदेश पुगेको छ । देश परदेश वैदेशिक रोजगारीमा जाने र गएका नेपालीलाई सुरक्षित, व्यवस्थित र मर्यादित वनाउने मल्टिमिडिया प्लेटफर्म हो । यो प्लेटफर्ममा रेडियो र अनलाईन एकअर्कासित अन्तरंग जोडिएका छन् । विदेश जान चाहने नेपाली र विदेशमा रहेका नेपालीका भावना, भोगाई, चासो र सरोकारका बिषय र घटनाहरु यो प्लेटफर्मका मुख्य बिषयबस्तु हुन् । यिनै बिषयमा हरेक मंगलवार बिहान ८ः२० देखि ९ः०० बजेसम्म देशभरिका सयभन्दा धेरै स्टेशनबाट रेडियो कार्यक्रम देश परदेश प्रसारण हुन्छ । विदेशमा काम गर्न जाने र विदेशमा काम गरिरहेका नेपालीका काम, सीप र कमाईसँग सम्बन्धित अनुभव, कथाव्यथा, जानकारी, प्रश्न उत्तर र समाचार तथा टिप्पणीहरु सँगै रेडियो कार्यक्रम समेत अनलाईन पोर्टलमा समेटिन्छन् । उज्यालोको देश परदेश मल्टिमिडिया प्लेटफर्म तपाईंको साथ र सहयोगमा वैदेशिक रोजगारलाई सुरक्षित, व्यवस्थित र मर्यादित वनाउने अभियान हो । हामी तपाईंलाई आफ्ना अनुभव, सीप, कमाई, सफलता र विफलताका कथा, समाचार, टिप्पणी तथा तपाईंका भोगाई लेखेर, बोलेर र भिडियोमा पठाएर यो अभियानमा साथ दिन र सहयोग गर्न अनुरोध गर्छौ । देश परदेश मल्टिमिडिया प्लेटफर्ममा तपाईंलाई हार्दिक स्वागत छ ! 

408_Desh Paradesh 2020-04-21

 कार्यक्रम देश परदेशको ४०८ औं अंक महामारीका बेला देश फर्किने कि परदेशमा जोगिने भन्ने विषयमा केन्द्रित छ । यूएईमा कोरोना सङ्क्रमितको उपचारमा संलग्न एक नेपाली नर्सको अनुभव । यो बेला परदेशमै सुरक्षित भएर बस्न ठिक कि नेपाल फर्कनु उचित छ ? प्रवासी नेपाली समन्वय समिति (पीएनसीसी) मा आवद्ध कुलप्रसाद कार्कीको बिचार कार्यक्रममा सुन्न सकिन्छ । परदेशमा समस्यामा परेका नेपाली श्रमिकलाई स्वदेश ल्याउन कत्तिको सम्भव छ त भन्नेबारे श्रम तथा आप्रवासन विज्ञ डा. गणेश गुरुङसितको कुराकानी पनि कार्यक्रममा समावेश छ । अनि, परदेशबाट तपाईँले राख्नुभएका प्रश्न हामीले श्रम रोजगार तथा सामाजिक सुरक्षा मन्त्रालयका सचिव विनोद केसीबाट ल्याएका छौं । कार्यक्रममा तपाईँका चासो र रुचिका विषय समेटिएको गतिविधि पनि समावेश छ ।