चिलिमे–त्रिशूली प्रसारण लाइनको काम अबकाे ७ महिनाभित्र सक्ने लक्ष्य

 पुस ३०, २०७८ शुक्रबार १३:२२:१२ | उज्यालो सहकर्मी
unn.prixa.net

रसुवा : चिलिमे–त्रिशूली २२० केभी प्रसारण लाइन निर्माणको ६५ प्रतिशत काम सकिएको छ । आयोजनाले अहिले टावर निर्माणको कामलाई गति दिएको छ ।  प्रसारण लाइनमा जोडिने जलविद्युत् आयोजनाहरूको प्रसारण समय नजिकिँदै जाँदा आयोजना निर्माणमा गति दिइएको हो । 

जिल्लामा निर्माण भइरहेका आयोजनाहरूको विद्युत् उत्पादन हुने समय नजिकिँदै गएपछि आयोजनामा दबाब परेको छ । अबको सात महिनाभित्रमा आयोजनाको काम सकाउने गरी काम गरिरहेको आयोजना प्रमुख शुभारम्भविक्रम शाहले बताउनुभयो । ‘हामीले कामलाई गति दिएका छौँ’, उहाँले भन्नुभयो, ‘अबको सात महिनाभित्र काम सकाउने लक्ष्य छ । 

गोल्जुङदेखि 'थ्री–बी' हबसम्म ७९ वटा टावर रहने बताइएको छ । जसमा ३३ वटा टावरको फाउण्डेशनको काम सकिएको छ । नाै वटा टावर खडा भइसकेको छ । दुई वटा निर्माण हुँदैछ । 

२०७४ पुस ५ देखि प्रसारण लाइन निर्माण सुरु भएको आयोजनाको २०७६ जेठ ३० मा निर्माण सम्पन्न गर्ने कार्ययोजना रहेको थियो । भौगोलिक विकटता, सडकको पहुँच नपुगेको, डिजाइनमा धेरै समय लागेको, सबस्टेशन निर्माणका लागि जग्गा अधिग्रहणमा ढिलाइ, वैदेशिक सहायता पर्खनुपर्ने, जग्गा सट्टा, रुख कटानका लागि समयमै अनुमति नपाउनु लगायतका कारणले ढिलाइ भएको आयोजनाले जनाएको छ । 

रसुवाको माथिल्लो क्षेत्रमा निर्माण हुने जलविद्युत् आयोजनाबाट उत्पादन हुने विद्युत् राष्ट्रिय प्रसारण लाइनमा जोड्नका लागि प्रसारण लाइन निर्माण गरिएको हो । प्रसारण लाइन निर्माणका लागि २०७४ कात्तिक२७ मा ठेक्का सम्झौता भएको थियो । 

रसुवाको आमाछोदिङ्मो गाउँपालिकामा रहेकाे गोल्जुङदेखि नुवाकोटको किस्पाङ गाउँपालिकामा रहेकाे त्रिशूली 'थ्री–बी' हबसम्म प्रसारण लाइन निर्माण हुनेछ । प्रसारण लाइनको दुरी साढे २७ किलोमिटर रहेको छ । 

गोल्जुङदेखि मैलुङसम्म २२० केभी डबल सर्किट र मैलुङदेखि त्रिशूली 'थ्री–बी' को हबसम्म ‘फोर सर्किट’ प्रसारण लाइन निर्माण हुनेछ । गोल्जुङदेखि 'थ्री–बी' हबसम्म ७९ वटा टावर रहने बताइएको छ । 

प्रसारण लाइन र सब–स्टेशन निर्माणका लागि नेपाल सरकार, जर्मन सहयोग नियोग केएफडब्ल्यूको अनुदान तथा युरोपियन इन्भेस्टमेन्ट बैंकको ऋण लगानी छ । प्रसारण लाइन निर्माणपछि जिल्लाको गोसाईंकुण्ड गाउँपालिका र आमाछोदिङ्मो गाउँपालिकामा निर्माणाधीन जलविद्युतकाे बिजुली जोडिने छ । 

यो प्रसारण लाइनमा २१६ मेगावटको माथिल्लो त्रिशूली एक, १२० मेगावटको रसुवा भोटेकोसी, १११ मेगावटको रसुवागढी, ७८ मेगावटको सान्जेन खोला, ४२ दशमलव ५ मेगावटको सान्जेन, २० मेगावटको लाङटाङ खोला, १४ दशमलव ८ मेगावटको माथिल्लो सान्जेन, ६ दशमलव ४२ मेगावटको माथिल्लो मैलुङ 'ए' जलविद्युत् आयोजनाको बिजुली जोडिने छ । यो प्रसारण लाइनमा ७ सय मेगावट बिजुली जडान गर्न सकिने छ । 

अन्तिम अपडेट: माघ १, २०७८

तपाईको प्रतिक्रिया