पूर्व कानुन मन्त्री तथा पूर्व महान्यायाधिवक्ता अग्निप्रसाद खरेल अधिवक्ता एवं एमाले नेता हुनुहुन्छ । खरेलको जन्म वि.स.२०१७ सालमा पूर्वी पहाडी जिल्ला ताप्लेजुङ्गको थेचुम्वुमा भएको हो । पछि वि.स. २०२४ सालदेखि झापामा बसोबास गर्दै आउनुभएको छ ।
वि.स. २०३४ सालमा एसएलसी उत्तीर्ण गर्नुभएका खरेल १७ वर्षको उमेरमा राजविराज क्याम्पसको स्ववियू सचिव हुँदै काठमाण्डौ आउनुभयो । उहाँ वि.स. २०५४ सालमा नेपाल बार एसोसिएशनको महासचिव बन्नुभयो । त्यसको १५ वर्षपछि वि.स.२०६९ सालमा वरिष्ठ अधिवक्ता हुनुभयो । केपी शर्मा ओली सरकारमा महान्यायाधिवक्ता रहेका खरेलले राजनीतिमा फर्किने भन्दै पदबाट राजीनामा दिनुभएको थियो । उहाँ २०७४ फागुन ८ देखि २०७७ चैत ६ सम्म महान्यायाधिवक्ताको पदमा रहनुभयो । पछिल्लो समय उहाँ एमालेको जिल्ला इञ्चार्जको जिम्मेवारी लिएर झापामा नै बस्दै आउनुभएको छ ।