एमाले नेता देवराज घिमिरेको जन्म ताप्लेजुङको सिकैचा–६ (हाल श्रीजंगा गाउपालिका ३) मा वि.स. २०१३ साल जेठ १३ गते भएको हो । धरानको महेन्द्र बहुमुखी क्याप्पसबाट आई.ए.उत्तीर्ण गरेका घिमिरेले पार्टी कामको सिलसिलामा समय समयमा कलेज छाड्दै पढ्दै गर्नुभयो ।
काठमाण्डौको त्रिचन्द्र क्याप्पसमा डिप्लोमा पढ्दापढ्दै पार्टीको बुर्जुवा शिक्षा बहिष्कार गर्ने निर्णय मान्दै पूर्णकालीन कार्यकर्ताको रुपमा नेपाल कम्युनिष्ट पार्टीको संगठन विस्तारमा लागेका घिमिरेको औपचारिक शिक्षा भने त्यहीँ टुंगियो । त्यसपछि वि.स.२०३५ साल भदौमा पार्टी सदस्यता प्राप्त गर्नुभयो ।
नेकपा मालेका भूमिगत राष्ट्रिय भेला र कार्यक्रममा सहभागी घिमिरे २०४६ सालको भदौमा लाहानमा सम्पन्न चौथो महाधिवेशन प्रतिनिधिको रुपमा सहभागी हुनुभयो । भूमिगत पार्टी जीवनमा विशिष्ट योगदान पुर्याएकै कारण घिमिरे नेकपा माले र एमालेको एकीकरणपछि २०४९ सालको पाँचौ राष्ट्रिय महाधिवेशनबाट पार्टीको केन्द्रीय कमिटीमा निर्वाचित हुनुभयो । वि.स.२०५० सालदेखि मेची अञ्चल इन्चार्जको जिम्मेवारी पाउनुभएका घिमिरेले यसअघि प्रत्यक्ष उम्मेदवार हुन पाउनुभएको थिएन ।
