हरियाली, बगैँचा र पौडी पोखरीका कारण लोकप्रिय होटल जलमहल

कास्की – पोखरा त्यसै रमाइलो । त्यसमाथि गर्मीको मौसम । पोखरामा रहेको जलमहल होटेलमा पौडी खेल्नुको आनन्द नै बेग्लै ।  

जलमहलको चिसो पौडी पोखरीमा पौडीको आनन्द लिन पाउँदा उत्तर प्रदेशको गर्मी छल्न पोखरा आएका मोहित श्रीवास्तवको अनुहार खुशीले धपक्कै बलेको थियो । पोखरा घुम्न आएका भारत उत्तरप्रदेशका मोहित श्रीवास्तव होटेल जलमहलको पोखरीमा सपरिवार पौडी खेल्दै थिए । 

श्रीमती र दुई छोरासहित पोखरा घुम्न आएका श्रीवास्तवले आफ्ना साथीहरुको सल्लाह अनुसार होटेल जलमहल छानेका थिए । काठमाडौं र लुम्बिनी घुमिसकेका श्रीवास्तवको पोखरा घुम्ने योजना त पहिलेदेखिकै हो । समय नमिलेर पोखरा भ्रमणलाई उनले थाति राखेका थिए । पोखरा घुम्ने मौका मिलाएर आएका मोहितले सन्तुष्ट भावमा मुस्कुराउदै भने ‘पोखरा अच्छा है, उस से ज्यादा होटल जलमहलका स्विमिड् पुल और रुम और भी अच्छा है ।’ 

पोखरा हिउँदमा चिनियाँ र वर्षाको समयमा भारतीय पर्यटकको आकर्षणमा पर्छ । परम्परागत पर्यटकीय मौसम असोजदेखि मंसिरसम्म युरोपेली, अमेरिकी र विदेशी पर्यटकको बाक्लो चहलपहल हुन्छ । पर्यटकको आवागमनले यहाँका होटल र होटलसित सम्बन्धित थुप्रै व्यवसायीहरुको व्यापार व्यवसाय फस्टाएको छ ।

पोखरा होटेलको शहर जस्तै भैसकेकाले कुन होटेलमा बस्ने भन्ने समस्या छैन । फेवा ताल किनार र तालको छेउछाउका होटेलहरु महंगा भए पनि धेरै टाढा नगई सहुलियत दरमा राम्रा र गुणस्तरीय होटेलहरु भेटाउन सकिन्छ । भारतबाट पोखरा घुम्न आएका मोहित पनि राम्रो र सहुलियत दरमा होटेल खोज्दै थिए । उनको रोजाईमा ड्यामसाइड र वरपरको पार्दी थियो । अन्त्यमा पार्दी बजारबाट थोरै भित्रपट्टी चचहुई फनपार्क र चौडा स्विमीङपुलसहितको होटेल जलमहल उनको रोजाइमा पर्यो ।

जलमहलमा पुगेपछि आफ्नो रोजाईको तारिफ गरे मोहितले । साँच्चिकै सुन्दर र शान्त वातावरणमा खोलिएको होटेल जलमहल बजारको भिडभाडबाट न धेरै नजिक छ, न त धेरै टाढा छ । गेटमा निलो बोर्डमाथि सेतो अंग्रेजी अक्षरले होटेल जलमहल लेखेको छ । गेटभित्र छिर्नेबित्तिकै लस्करै रोपिएका बाँसका बोटहरुले आगन्तुकलाई स्वागत गरिरहेको जस्तो लाग्छ ।

सुरुमा यो केटाकेटीका लागि खेल्ने फन पार्क थियो । नाम थियो चच हुई । २०६६ सालमा दिनेशराज प्रसाई र उहाँकी जीवनसाथी प्रतिक्षा क्षेत्रीले स्थापना गरेको फन पार्क विस्तारै रेष्टुरा र होटलका रुपमा विकसित हुँदै गयो । त्रिविमा पढाउन र व्यवसाय विस्तार गर्न दिनेशको धेरै समय अहिले काठमाडौमा बित्छ भने प्रतिक्षा होटलको दैनिकी व्यवस्थापन गर्नुहुन्छ । प्रतिक्षाको अनुभवले भन्छ, ‘होटेल सञ्चालन गर्न सजिलो त छैन, तर ग्राहकको चाहनालाई बुझेर सोहीअनुरुप सेवा दिने हो भने राम्रैसँग चल्छ ।’ 

यहाँ एक दिनको तीन हजार आठ सयदेखि आठ हजार सम्म पर्ने सुविधासम्पन्न ४० वटा कोठाहरु छन् । होटल सञ्चालिका क्षेत्रीका अनुसार यहाँ  ५० जना कामदार छन् । पाँचवटा भवनहरुमा रेष्टुराँ, कन्फेरेन्स हल र लजको व्यवस्थापन भएको छ । 

करिब २० रोपनी क्षेत्रफलमा फैलिएको होेटेल जलमहल सञ्चालन हुन थालेको तीन वर्ष मात्र पुग्यो । तर फराकिला कोठा, कोठासित जोडिएको पौडी पोखरी, हरियो बगैँचा र रुखपात अनि स्तरीय सेवाका कारण छोटो समयमा होटल जलमहलले पर्यटकहरुको मन जितेको छ । 

फूलहरुले सजिएको यो होटेलको उत्तरपट्टि देखिने माछापुच्छ्रे हिमालको दृश्यले मन लोभ्याउछ भने बच्चाहरुका लागि बनाईएको बालमैत्री स्विमिङ्गपुल र हरियालीले जलमहल केटाकेटी, यूवा र पाका सबैको रोजाईको होटल हुन पुगेको छ । त्यसैले त भारतको उत्तर प्रदेशबाट गर्मी छल्न सपरिवार आएका मोहित भन्छन् ‘पोखरा अच्छा है, उस से ज्यादा होटल जलमहलका स्वीमिड् पुल, खाना और रुम और भी अच्छा है ।’