काठमाण्डाै – काठमाण्डौको विभिन्न ठाउँमा ‘हाइकिङ’ जाने व्यक्तिहरूलाई खुकुरी देखाई लुटपाट गर्ने गिरोहका नाइके पक्राउ परेका छन् ।

हिजो काठमाण्डौको नागार्जुन नगरपालिका–७ विन्द्यवासिनी मन्दिर नजिकैको जङ्गलमा गाडीमा सवार व्यक्तिहरूलाई तीन जना व्यक्तिले खुकुरी देखाई लुटपाट गरी फरार भएको थिए । त्यसपछि खोजी गर्ने क्रममा यस घटनाको नाइके मकवानपुरको पदमपोखरी घर भएका ५२ वर्षीय धनबहादुर स्याङ्ताङलाई नागार्जुनको स्युचाटारबाट पक्राउ गरिएको जिल्ला प्रहरी परिसर काठमाण्डौको जनाएको छ ।

स्याङ्ताको साथबाट सुनको औँठी चार तथा तथा सुनको सिक्री, सुनको लकेट, सुनको सिक्रीको टुक्रा र चाँदीको ब्रासलेट एक थान बरामद गरिएको परिसरका प्रहरी उपरीक्षक (एसपी) नवराध अधिकारीले बताउनुभयो । यस्तै उनको साथबाट सुनको ब्रासलेट, कानमा लगाउने सुनको रिङ, खुकरी दुई थान तथा १३ हजार चार सय रुपैयाँ नगद बरामद भएको प्रहरीले जनाएको छ ।

यस्तै जिल्ला प्रहरी परिसर काठमाण्डौले गए राति कालोपुलको हिरारत्न हल नजिकै डेरा गरी बस्ने भूपेन्द्र तुलाधरको कोठाबाट चोरी गर्ने नुवकोटको विदुर नगरपालिका घर भई काठमाण्डौको ठमेल बस्ने १९ वर्षीय विकेश शाहीलाई पक्राउ गरेको छ । चोरी गरेर भाग्दै गरेका शाहीबाट प्रहरीले विभिन्न सामान पनि बरामद गरेको छ ।

यसैगरी प्रहरीले गए राति काठमाण्डौको बालाजु चोकमा रहेको माछापुच्छ्रे बैंकको एटीएम फुटाउँदै गरेका रौतहटको यमुनामाई गाउँपालिका घर भई काठमाण्डौको बालाजु बस्ने १८ वर्षीय राधेश्याम बैठालाई पक्राउ गरेको छ । प्रहरीले उनको साथबाट फलामको रड एक थान बरामद गरेको छ ।