चीनले भिसामा सहजीकरण गरेपछि पर्यटकको सङ्ख्या उल्लेख्य बढाएको छ । सन् २०२४ को पहिलो छ महिनामा चीनमा एक करोड ४० लाख ६४ हजार जना विदेशी पर्यटक पुगेका छन् । यो अघिल्लो वर्षको छ महिनाको तुलनामा एक सय ५२ प्रतिशतले धेरै हो ।

गएको जनवरीदेखि जुलाईसम्म चीन पुगेका एक करोड ४० लाख जना पर्यटकमध्ये ८० लाख जनाभन्दा धेरै पर्यटक भिसा फ्रि अभियानअन्तर्गत पुगेका चिनियाँ समाचार संस्था सिन्ह्वाले जनाएको छ । चीनको भिसा फ्रि नीतिको कारण नै पर्यटक बढेको खबरमा उल्लेख छ ।

चीनले ५४ वटा देशका मानिसका लागि भिसा फ्रि व्यवस्था गर्दै विमानस्थलमै पुगेपछि भिसा दिने नीति लागू गरिरहेको छ । गएको जुलाईमा भएको चिनियाँ कम्युनिष्ट पार्टीको २० औं केन्द्रीय समितिको तेस्रो पूर्ण सत्रमा पारित प्रस्तावले विदेशबाट आएका मानिसलाई बस्न, उपचार सेवा र चीनमा भुक्तानीका सेवालाई थप सहज बनाउने प्रतिवद्धता गरेको थियो ।

चिनियाँ केन्द्रीय बैंक पीपुल्स बैंक अफ चाइनाले अलिपे र टेनपे जस्ता प्रमुख मोबाइल भुक्तानी सेवा प्रदायकलाई सहजीकरण गर्दै कुनै पनि प्रयोगकर्ताले वार्षिक पाँच हजार रुपैयाँ मात्रै कारोबार गर्न पाउने सीमा बढाएर वार्षिक ५० हजार डलर पुर्‍याइदिएको छ ।

वाणिज्य मन्त्रालय र अन्य छ वटा सरकारी विभागले चीनमा विदेशी यात्रीको लागि आवासलाई थप सुविधा प्रदान गर्ने परिपत्र जारी गरेका छन् । चीनले विदेशी पाहुनाका लागि होटलमा प्रतिबन्ध खुकुलो बनाउँदै लगेको छ । चीनमा आन्तरिक पर्यटक पनि बढेका छन् । लामो दूरीको रेलमा यात्रा गर्नेहरु ४० प्रतिशतले बढेका छन् ।