चितवन – भौतिक पूर्वाधार तथा यातायातमन्त्री देवेन्द्र दाहालले नारायणगढ–बुटवल सडकको काम चाँडो सक्ने गरी सरकार अघि बढेको दाबी गर्नुभएको छ । चितवनमा आज भएको पत्रकार सम्मेलनमा पूर्वाधारमन्त्री दाहालले एक वर्षभित्र काम सक्ने गरी निर्माण कम्पनीसँग सहमति भएकाले काम हुने विश्वास व्यक्त गर्नुभयो ।

सडक निर्माणको काम शुरू भएको लामो समय भए पनि प्रगति हेर्दा ५५ प्रतिशत मात्र रहेको भन्दै मन्त्री दाहालले अहिले थपिएको एक वर्षमा ठेकेदारले जसरी पनि काम सक्नुपर्ने बताउनुभयो । काम चाँडो सक्नका लागि ठेकेदार कम्पनीसँग बारम्बार छलफल भइरहेकाले अब प्रगति हुने उहाँको भनाइ छ । बर्खा सकिएपछि कामको गति हेरिने र कामको गति बढाउन नसके सरकारले ठेकेदारको विकल्प खोज्ने मन्त्री दाहालले उल्लेख गर्नुभयो ।

यसैगरी उहाँले सरकारले क्युआर कोडसहितको लाइसेन्स जारी गर्ने तयारी गरिरहेको जानकारी दिनुभयो । लाइसेन्स वितरणको जिम्मेवारी प्रदेश सरकारको रहेको स्मरण गराउँदै मन्त्री देवेन्द्र दाहालले २० लाख वटा लाइसेन्स बन्ने प्रक्रियामा रहेका र पाँच लाख वटा लाइसेन्स बनिसकेको बताउनुभयो ।