अमेरिकाले चीनका लागि जासुसी गरेको आरोपमा आफ्नै केन्द्रीय गुप्तचर एजेन्सी (सीआईए) का पूर्व कर्मचारीलाई दश वर्षको जेल सजाय सुनाएको छ । ७१ वर्षीय अलेक्जेन्डर युक चिङ्ग माले चीनलाई गोप्य जानकारी बेचेको स्वीकार गरेपछि १० वर्षको जेल सजाए सुनाइएको बीबीसीले जनाएको छ । मा सन् २०२० को अगस्ट मा पक्राउ परेका थिए ।

हङकङमा जन्मिएकामा अमेरिकी नागरिक हुन् । उनले सन् १९८२ देखि १९८९ सम्म सीआईएमा र त्यसपछि एफबीआईमा काम गरेका थिए । अमेरिकी सरकारका वकिलहरूले अनुसन्धानमा माले पूर्ण सहयोग गरिरहेको बताएका छन् । अधिकारीले माले सीआईए एजेन्ट एकजना आफन्तसँग मिलेर चीनको शङ्घाई राज्य सुरक्षा ब्यूरोका गुप्तचर अधिकारीलाई गोप्य जानकारी दिएको बताएका छन् ।

हङकङमा भएको एक बैठकमा रेकर्ड गरिएको भिडियोमा माका साथीले गोप्य जानकारीको बदलामा ५० हजार डलर नगद गन्ती गरेर लिएको देखिएको अधिकारीको दाबी छ । उनी सन् २००४ मा हवाईमा बस्दा एफबीआईमा आबद्ध भएका थिए ।  एफबीआईले उनको गतिविधिबारे पहिले नै शङ्का गरेको थियो ।