भारतीय नागरिकको घरमा बाँके मालपोतको ढड्डा, किर्ते गर्ने १० जना पक्राउ

चैत ५, २०७५ मंगलबार १५:४:५७ | गोविन्द शर्मा

बाँके – भूमि सुधार तथा मोलपोत कार्यालय बाँकेको ढड्डा व्यक्तिको घरमा फेला परेको छ ।

त्यही ढड्डाको आधारमा जिल्ला प्रहरी कार्यालय कार्यालय बाँकेले सरकारी कागज किर्ते गरेको अभियोगमा मालपोत कार्यालय बाँकेका ६ जना कर्मचारी, दुईजना बर्दियाका र दुईजना बाँकेका लेखनदासलाई पक्राउ गरेको छ ।

पक्राउ पर्नेमा मालपोत कार्यालय बाँकेका नासु रामबहादुर खड्का, रुद्र देवकोटा र टंक शर्मा तथा कम्प्युटर कर्मचारी यज्ञश्वर वली र प्रेमचन्द्र ठकुरी पक्राउ परेका छन् । यसैगरी लेखनदास वीरबहादुर खड्का पनि पक्राउ परेका छन् ।

यसैगरी मालपोत कार्यालय बाँकेमा पहिले अधिकृत रहेकी तथा हाल जिल्ला हुलाक कार्यालय बाँकेमा कार्यरत पुष्पा श्रेष्ठलाई समेत पक्राउ गरिएको छ । यसैगरी भूमि सुधार तथा मालपोत कार्यालय बर्दियाका नासु कृष्णलाल शर्मा र खरिदार भूमिराज पोख्रेलसमेत पक्राउ परेका छन् ।

नेपालगञ्जमा बस्दै आएका भारतीय नागरिक जुनेद अन्सारी र खैरुल हसन अन्सारीले जग्गाको कारोबार गर्दै आएका थिए । झण्डै डेढ महिना पहिले जुनेद सम्पर्कविहीन भए । हराएको भोलिपल्ट भारतमा एकजना व्यक्तिको शव भेटियो ।

केहीदिनपछि जुनेदले लगाएको कपडाको आधारमा परिवारले शवको पहिचान गर्‍यो । लगत्तै परिवारका तर्फबाट खैरुलको विरुद्धमा जिल्ला प्रहरी कार्यालय बाँकेमा अपहरण तथा ज्यान मुद्धा जाहेर भयो । खैरुल दुई सातादेखि जिल्ला प्रहरी कार्यालयको नियन्त्रणमा छन् ।

घटनाको अनुसन्धान गरिरहेको प्रहरीले मृतक जुनेदको घरबाट मालपोत कार्यालय बाँकेको सरकारी लिखत भएको प्रमाणित ढड्डा फेला पारेको प्रहरी उपरीक्षक अरुण पौडेलले बताउनुभयो । ढड्डामा सरकारी जग्गाको श्रेष्ता समेत फेला परेपछि प्रहरीले सरकारी कागज किर्तेको विषयमा थप अनुसन्धान अघि बढाउँदै संलग्न देखिएका कर्मचारीलाई पक्राउ गरेको हो ।

भूमि सुधार तथा मालपोत कार्यालय बाँकेका प्रमुख प्रेम दौल्यालले आफू कार्यालय प्रमुखको रुपमा आउनुभन्दा पहिलेको घटनामा कर्मचारीलाई पक्राउ गरिएको जानकारी दिनुभयो ।

मालपोतका अनुसार, बागेश्वरी मन्दिर नजिकैको खाल्डो भएको जमिन झण्डै ५ कठ्ठा र कारकादौंमा ५ कठ्ठा १३ धुर जग्गाको कागजात किर्ते गरिएको प्रहरीको दाबी छ ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

गोविन्द शर्मा

गोविन्द शर्मा बाँकेका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्