नेपाल एयरलाइन्सको काठमाण्डौ–दुबई उडान कटौती, वाइडबडी जहाज प्रयोग गरिने

चैत ९, २०७५ शनिबार १४:३८:१४ | उमाकान्त पाण्डे

यूएई – नेपाल एयरलाइन्सले काठमाण्डौबाट दुबईका लागि गर्दै आएको उडान कटौती गरेको छ । त्रिभुवन विमानस्थल निर्माण र दुबइ एयरपोर्ट टर्मिनल दुईमा पुनर्निर्माणका काम काम हुने भएपछि एयरलाइन्सले उडान कटौती गरेको हो ।

एयरलाइन्सले चैत १८ गते अर्थात अप्रिल एक तारिखदेखि असार १५ गते अर्थात जुन ३० तारिखसम्मका लागि उडानमा कटौती गरेको हो । यसअघि दैनिक उडान गर्दै आएको एयरलाइन्सले यो अवधिमा हप्तामा तीन दिन मात्रै उडान गर्ने भएको छ ।

चैत १८ गतेदेखि एयरलाइन्सले काठमाण्डौबाट मंगलबार, बिहीवार र शनिबार तथा दुबईबाट बुधवार, शुक्रबार र आइतबार मात्रै उडान गर्ने एयरलाइन्सका यूएई प्रमुख टिकाराम पङ्गेनीले जानकारी दिनुभयो ।

यस्तै उडानको समय पनि परिवर्तन गरिएको छ । परिवर्तित समय अनुसार एयरलाइन्सले नेपालबाट राती सवा ९ बजे र दुबईबाट बिहान २ः २० मा उडान भर्नेछ । समय र विमानस्थल परिवर्तन भए पनि आबुधाबी र दुबईबाट विमानस्थलसम्म जान र आउन दिइने बस सेवा भने यथावत राखिएको पङ्गेनीले बताउनुभयो ।

दुबई विमानस्थलको दक्षिण पूर्व तर्फको धावनमार्ग पनि मर्मतका लागि बन्द हुने भएकाले तीन महिनाका लागि दुबईमै रहेको अल मक्तुम विमानस्थलबाट उडान र अवतरण गर्ने नेपाल एयरलाइन्स यूएई शाखाले शुक्रबार आबुधाबीमा पत्रकार सम्मेलन गरेर जानकारी गराएको हो ।

उडान तालिका तथा अवतरण हुने स्थान परिवर्तन हुँदा सेवाग्राहीले थप शुल्क तिर्नु नपरोस भनेर यो अवधिमा एक पटकका लागि टिकट परिवर्तन गर्दा कुनै शुल्क नलाग्ने व्यवस्था गरिएको एयरलाइन्सले जनाएको छ ।

उडान कटौती भए पनि यात्रुको चाप कम नहुने भएकाले वाइडबडी विमानबाट व्यवसायिक उडान गरिने भएको छ । यसअभि न्यारोबडी मार्फत एक पटकमा १ सय ५८ यात्रु बोक्दै आएकोमा वाइडबडी मार्फत २ सय ७४ जना यात्रु बोक्ने एयरलाइन्सले जनाएको छ ।

नेपालको ध्वजाबाहक नेपाल वायुसेवा निगमले ४ बर्ष रोकिएको दुबई उडान सन् २०१६ को अगस्ट १८ देखि सुरु गरेको थियो । निगमले नयाँ जहाज ल्याएपछि भने अघिल्लो बर्षको अगष्ट महिनादेखि दैनिक उडान गर्दै आएको थियो ।

वाइडबडी विमानले उडान सुरु गरेपछि आपतकालिन अवस्थामा रहेका बिरामीलाई चिकित्सकको सल्लाह अनुसार यात्रा गराउन सकिने एयरलाइन्सले जनाएको छ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

उमाकान्त पाण्डे

उज्यालाे सहकर्मी उमाकान्त पाण्डे युएईमा बसेर पत्रकारिता गर्नुहुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्