बाह्र बालबालिकाको अभिभावकत्व लिँदै पूर्व मन्त्री शर्माले गरे विद्यालय भर्ना

वैशाख ४, २०७६ बुधबार १८:८:२४ | उज्यालो सहकर्मी

रुकुम पश्चिम -बालगृहमा बसिरहेका अभिभावकविहीन १२ जना बालबालिकालाई पूर्व गृहमन्त्री एवं प्रतिनिधिसभा सदस्य जनार्दन शर्माले विद्यालयमा भर्ना गर्नुभएको छ ।

आठबीसकोट नगरपालिका–११ सिमबजारको सिस्ने हिमालबाल गृहमा बस्दै आएका १२ जना बालबालिकालाई वडा नं. ९ मा रहेको दीपज्योति आधारभूत विद्यालयमा भर्ना गरिएको हो । अघिल्लो शैक्षिक सत्रको भर्ना अभियानको दिन अभिभावकत्व ग्रहण गरेर भर्ना गरेका ६ बालक र ६ बालिकालाई यो वर्ष पनि शर्माले विद्यालयमा भर्ना गरिदिनुभएको हो ।

अभिभावकत्व ग्रहण गरिसकेपछि यो वर्ष पनि उनीहरुलाई विद्यालय भर्ना गर्न आफैं उपस्थित हुन नसक्ने भएपछि जनक बटालामार्फत विद्यार्थी भर्ना गरिएको हो ।

विद्यालय भर्ना गरेकै दिन उनीहरुलाई वर्षभर पुग्ने शैक्षिक सामग्री पनि प्रदान गरिएको छ । विद्यालय पोशाक नगरपालिकाले दिने भएकाले शर्माले कापी र कमल सहयोग गर्नुभएको छ ।

शैक्षिक सत्र २०७६ को भर्ना अभियान सुरु भएसँगै उनीहरुलाई भर्ना गरिएको हो । शर्माले अभिभावकत्व ग्रहण गरेका मध्ये ५ जना आमाबाबु दुवै नभएका बालबालिका छन् । आठबीसकोट नगरपालिका–१२, का नवराज बुढा मगर, डिल्लीबुढा मगर, ५ नम्बर वडाका बमबहादुर गिरी, बिर्खबहादुर गिरी र पुतली थापाका आमाबुबा दुवैको मृत्यु भएको छ ।

यसैगरी बुबाको मृत्युपछि आमाले दोस्रो बिहे गरेका कारण संरक्षणविहीन बनेका आठबीसकोट नगरपालिका–११ कीडिला सिर्पाली, मनिषा सिर्पाली, वडा नं ९ कि सुशिला चदारा र वडा नं ११ का गोपाल विकको पनि शर्माले अभिभावकत्व ग्रहण गर्नुभएको छ ।

बुबाको मृत्युपछि आमा घरबारविहीन बनेका आठबीसकोट नगरपालिका–९ का जीवन बटाला, ८ कि यसुदा सार्की र आमाको मृत्युपछि बुबा सम्पर्कविहीन भएकी त्रिवेणी गाउँपालिका–१० रुकुम पश्चिमकी खिमा ओलीलाई पनि शर्माले अघिल्लो वर्षदेखि अभिभावकत्व ग्रहण गर्नुभएको हो ।

१२ जना नै अघिल्लो वर्ष भर्ना भएको कक्षाबाट राम्रो अंकसहित उत्तीर्ण भएर माथिल्लो कक्षा पुगेका छन् । नवराज कक्षा ५, डिल्लीबुढा २, डिला २, मनिषा ४, सुशीला २ र गोपाल ३ कक्षामा भर्ना भएका छन् । यसैगरी जीवन ३, यसुदा ५, खिमा ४, बमबहादुर ४, विर्खबहाुदर १ र पुतली ५ कक्षामा भर्ना भएका छन् ।

उनीहरुको भरणपोषणका लागि पनि शर्माले अघिल्लो वर्ष २ लाख ७७ हजार रुपैयाँ सहयोग गर्नुभएको थियो । शर्मा आफैले र सहयोगबाट पहल गरेर बाल गृहलाई आर्थिक तथा अन्य सामग्री सहयोग गरेको बाल गृह सञ्चालक समितिकी अध्यक्ष सुनिता चनाराले बताउनुभयो ।

अन्तिम अपडेट: फागुन १८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्