कर्मचारी खोज्दै नगरपालिकाका मेयर मन्त्रालयमा

वैशाख ६, २०७६ शुक्रबार १०:५२:५२ | मनिराज पाण्डे

कालिकोट – स्थानीय तहमा कर्मचारी नहुँदा काम गर्न असहज भएपछि रास्कोट नगरपालिकाका मेयर कर्मचारी खोज्दै काठमाण्डौ पुगेका छन् । कर्मचारी समायोजनपछि कालिकोटका स्थानीय तहमा प्रमुख प्रशासकीय अधिकृत र लेखापाल गएका छैनन् ।

सरकारले कर्मचारी समायोजन गर्दा नै दुर्गम तथा विकट जिल्लाहरुलाई उपेक्षा गरेको स्थानीयको आरोप छ । कालिकोटको पलाँता, पचालझरना, सान्नीत्रिवेणी, नरहरीनाथ, महाबै गाउँपालिका र रास्कोट नगरपालिमा प्रमुख प्रशासकीय अधिकृत छैनन् । कालिकोटमा ९ वटा स्थानीय तह मध्य ६ वटा स्थानीय तह खाली छन् ।

स्थानीय कर्मचारी नै नहुनु, भएका स्थानीय कर्मचारीले सुविधा सम्पन्न ठाउँ खोज्नु र विकट तथा दूर्गममा काम गर्ने कर्मचारीहरुका लागि विशेष प्रोत्साहन गर्ने खालको नीति नहुनुले दूर्गममा कर्मचारी नबस्ने गरेको रास्कोट नगरपालिकाका मेयर काशीचन्द बरालले बताउनुभयो ।

बरालले भन्नुभयो ‘नगरपालिकामा लेखापाल नै छैनन्, कर्मचारी पठाइदिनु पर्‍यो भनेर मन्त्रालय धाउँदै छु ।’ स्थानीय तहमा प्रमुख प्रशासकीय अधिकृत र लेखापाल नहुदा अपेक्षाकृत विकास बजेट खर्च नहुने देखिन्छ ।

कर्मचारी नभएपछि आयोजनाहरुको सम्झौता, पेस्की दिने काम, दैनिक प्रशासनिक कामसँगै विकास निर्माणका कामहरु ठप्प भएका छन् । कर्मचारी समायोज भएको मितिले ३५ दिन भित्र सम्बन्धित कार्यालयमा पुग्न पर्छ । बाटो म्याद ७ दिन हुन्छ तर स्थानीय निकाय खालि भएको एक महिना बढी भयो कर्मचारी गएका छैनन् ।

स्थानीय कर्मचारी हुँदै नहुनु र भएकाले पनि संघ र प्रदेश रोज्नुले कर्णालीका स्थानीय तहमा एक वर्षभन्दा बढी कर्मचारी अभाव खेप्नु पर्ने अवस्था रहेको कालिकोटका प्रमुख जिल्ला अधिकारी चन्द्रबहादुर कार्कीले बताउनुभयो ।

समयमै गाउँपालिकाबाट बजेट निकासा नहुँदा स्थानीय संस्था किर्डाक नेपालसँगको साझेदारीमा सञ्चालन गर्न लागिएको दिगो खानेपानी सरसफाइ तथा स्वच्छता कार्यक्रम सञ्चालन गर्न कठिनाइ भएको पलाँता गाउँपालिका अध्यक्ष लक्ष्मणबहादुर बमले बताएउनुभयो ।

स्थानीय तहमा कर्मचारी अभाव हुँदा प्रदेश सरकारको विकास बजेट अपेक्षाकृत खर्च नहुने देखिएको छ । कालिकोट मात्र नभई कर्णाली प्रदेशका अन्य जिल्लामासमेत प्रमुख प्रशासकीय अधिकृत र लेखा अधिकृतको अभाव देखिएको छ ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मनिराज पाण्डे

कालिकोटका पत्रकार मनिराज पाण्डे उज्यालोका जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्