सगरमाथा आरोहण : आधार शिविरमा उत्साह र हुटहुटी !

जेठ १, २०७६ बुधबार १५:४०:४१ | भाेजेन्द्र बस्नेत

काठमाण्डौ – यस यामको सगरमाथा आरोहण मंगलबारबाट सुरु भएको छ । मंगलबार सगरमाथा आरोहणका लागि बाटो बनाउने शेर्पाहरुको ८ सदस्यीय टोली शिखरमा पुगेसँगै यो यामको आरोहण सुरु भएको पर्यटन विभागका सूचना अधिकारी सुरेन्द्र थापाले जानकारी दिनुभयो ।

बुधबार कामीरिता शेर्पाले सगरमाथा आरोहण गरेर नयाँ कीर्तिमानी कायम गर्नुभएको छ । २३ पटक सगरमाथा आरोहण गरेर शेर्पाले यसअघि आफ्नै नाममा रहेको सबैभन्दा धेरै पटक सगरमाथा आरोहण गरेको कीर्तिमानी तोड्नुभएको हो । आरोहणका लागि सगरमाथाको मौसमअनुकुल भएसँगै आरोहीहरु सगरमाथा आधार शिविरबाट उकालो लागेका छन् ।

आरोहण सुरु भएसँगै सगरमाथाको आधार शिविरभन्दा माथि आरोहीहरुको भिड बढेको छ । एकैपटक माथि जाँदा बाटोमा ट्राफिक जाम हुने भएकोले आरोहणको व्यवस्थापन गर्ने कम्पनीहरुसँग समन्वय गरेर आरोही पठाउने काम भैरहेको आधार शिविरमा रहनु भएका पर्यटन विभागका निर्देशक मिरा आचार्यले बताउनुभयो ।

मे २९ भित्रमा सगरमाथा चढिसक्नुपर्ने र त्यसमा पनि अब बढीमा एक हप्ताको मौसममात्र अनुकुल रहने भएकोले अबको एक हप्ता आरोहणका भिड नै लाग्छ ।

अहिले सगरमाथा आधार शिविर शहरजस्तै बनेको छ । दोश्रो तथा तेश्रो शिविरमा पनि आवातजावत निकै बढेको आरोहण गर्नको लागि आधार शिविरमा रहनुभएका निमाडोमा शेर्पाले बताउनुभयो ।

आधार शिविरमा रहेका आरोही विजय घिमिरे आधार शिविरदेिख तेश्रो शिविरसम्म गरेर झण्डै दुई हजार मानिस रहेको बताउनुहुन्छ । आरोहीहरु शरीरलाई समअनुकुल बनाउन तलमाथि हिँड्नुको साथै मौसम अनुकुलताको पर्खाइ गरिरहेका छन् ।

नेपालमा सगरमाथाको दक्षिण मोहडापट्टि ५,३८० मिटरको उचाइमा आधार शिविर छ । यस वर्ष सगरमाथा आरोहणका लागि ३७९ जना आरोहीहरु आधार शिविरमा पुगेका छन् ।

पर्यटन विभागको तथ्याङ्कअनुसार ३६ वटा समूहमा ३६६ जना विदेशी र ६ वटा समूहमा १३ जना नेपालीले आरोहण अनुमति लिएर आधार शिविर गएका छन् । ल्होत्से हिमाल आरोहणका लागि ९८ जना, नुप्त्सेका ३७ जना आरोहीसहित आरोहीका सहयोगी, भान्छेलगायत गरेर झण्डै दुई हजार मानिस आधार शिविरमा रहेका छन् ।

दुई हप्ताअघि बङ्गालको खाडीमा उत्पन्न भएको समुद्री आँधी फणीको प्रभावका कारण सगरमाथा क्षेत्रमा केही तनाव सिर्जना भएको थियो । आधार शिविरभन्दा माथि रहेका आरोहीहरु आधार शिविर झरे भने हावाहुरीका कारण झण्डै एक सय पाल उडाएको थियो । अहिले भने मौसम अनुकल रहेको पर्यटन विभागका निर्देशक मिरा आचार्यले बताउनुभयो ।

सन् १९५३ मा पहिलो पटक सगरमाथाको शिखरमा मानव पाइला पुगेको थियो । त्यसपछि अहिलेसम्म झण्डै ४ हजार ८ सय मानिस सगरमाथाको शिखरमा पुगेका छन् ।

यतिबेला सगरमाथाको आधार शिविर र त्यसभन्दा माथि आरोहीहरुको बजार र लर्को लागेको छ भने कतिबेला शिखर चुम्न पाइन्छ भनेर आरोहीहरु प्रतिक्षामा रहेका छन् ।

-सगरमाथा आरोहणसम्बन्धी तस्बिरहरु आधार शिविरमा रहनु भएका ल्हाक्पा नुर्वु शेर्पा, निमा डोमा शेर्पा र आङ छिरिङ लामाको अनुमतिबाट उहाँहरुकाे फेसबुक पेजबाट लिइएको हो ।

अन्तिम अपडेट: मंसिर २८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

भाेजेन्द्र बस्नेत

भाेजेन्द्र बस्नेत उज्यालाेमा कार्यरत हुनुहुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्