वालिङको घ्वाङखोला धार्मिक र पर्यटकीय क्षेत्रको रुपमा परिणत हुँदै

साउन ८, २०७६ बुधबार १५:४७:३७ | राधाकृष्ण डुम्रे

स्याङ्जा - वालिङ नगरपालिकाको वडा नम्बर ८ र १० मा पर्ने घ्वाङखोला धार्मिक तथा पर्यटकीय क्षेत्रका रुपमा परिणत हुँदै गएको छ ।

प्रसिद्ध ग्रहौंकालिका मन्दिरको काखमा रहेको घ्वाङखोला क्षेत्रमा एकीकृत रुपमा विभिन्न कामहरु भइरहेका छन् । झण्डै १ सय ३० रोपनी क्षेत्रफलमा फैलिएको घ्वाङखोला सामुदायिक वनको अधिकांश क्षेत्रलाई पर्यटकीय क्षेत्रको रुपमा विकास गरिँदै आएको हो ।

वालिङ बजारबाट निक्कै नजिक पर्ने त्यस क्षेत्रमा दिनहुँ जसो वनभोज खान जानेको घुइँचो नै लाग्ने गर्दछ । मनोरम हरियाली जंगल, आकर्षक पुल, माछापोखरी, स्वीमिङ पुल, विभिन्न खाले पिङहरु लगायतका संरचनाका कारण पछिल्लो समय घ्वाङघोला क्षेत्रमा पर्यटकको बाक्लो उपस्थिति रहने गरेको छ ।

ग्रहौंसुर मन्दिर पुग्नको लागि सबैभन्दा सहज सडकसँग जोडिएको घ्वाङखोलाको विकासका लागि वालिङ नगरपालिकाले प्राथमिकतामा राखेको नगरप्रमुख दिलिप प्रताप खाँणले जानकारी दिनुभयो ।

उहाँले सो क्षेत्रमा तीन वटा फरक शैलीका पार्क तथा कृत्रिम तालहरु निर्माण गर्ने योजना रहेको बताउनु भयो । प्रमुख खाँडले पर्यटकीय क्षेत्रको रुपमा विकास गर्न निर्माण हुने चिल्ड्रेन पार्क स्थानीय र प्रदेश सरकारको अगुवाइमा बन्नेछ भने नलेज (ज्ञान) पार्क इसिमोडले निर्मार्ण गर्ने जानकारी दिनुभयो । घ्वाङखोला क्षेत्रमा नै रहेको व्यक्तिगत जग्गालाई समेत लिएर पर्यावरणीय रिसाेर्ट बनाउने योजना रहेको नगर प्रमुख खाँडको भनाइ छ ।

नगरपालिकाको ८ र १० नम्बर वडा कार्यालयले समेत नगर कै उत्कृष्ट धार्मिक तथा पर्यटकीय क्षेत्र बनाउन योजना बनाइरहेको जनाएका छन् । वडा नम्बर १० का अध्यक्ष अनन्तराज गैह्रेले भन्नुभयो, घ्वाङखोलालाई नगरकै नमुना क्षेत्रको रुपमा विकास गर्न वडाले समन्वय गरिरहेको छ ।

त्यस क्षेत्रमा निर्माण गरिएको शिवपार्वतीको मन्दिर, विभिन्न भगवानका मूर्तिहरु, विशाल हनुमानको मूर्ति मुख्य आकर्षकका केन्द्र रहेका छन् । वडा नम्बर ८ ले समेत घ्वाङखोला क्षेत्रको एकीकृत विकासको लागि अभियान सुरु गरेको वडाध्यक्ष कमल प्रसाद सुवेदीले बताउनु भयो ।

डिभिजन वन कार्यालय स्याङ्जाले पनि समुदायको सहकार्यमा त्यस क्षेत्रलाई धार्मिक तथा पर्यटकीय क्षेत्र बनाउनका लागि काम गरिरहेको कार्यालयका सहायक वन अधिकृत बसन्तकेशव अधिकारीले जानकारी दिनुभयो ।

यसैबीच आर्थिक वर्ष २०७५-०७६ मा डिभिजन वन कार्यालय तथा पर्यटन विभाग मार्फत प्राप्त भएको १५ लाख रुपैयाँ र गण्डकी प्रदेशबाट प्राप्त भएको ३ लाख रुपैयाँबाट विभिन्न संरचना तयार गरिएको घ्वाङखोलालाई धार्मिक तथा पर्यटकीय क्षेत्रका सदस्य दीपक सुवेदीले जानकारी दिनुभयो ।

अन्तिम अपडेट: पुस ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राधाकृष्ण डुम्रे

स्याङजाका पत्रकार राधाकृष्ण डुम्रे उज्यालोका जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्