यसरी भेटियो ओडारमा लुकाएर राखिएको १६ किलो सुन

साउन ९, २०७६ बिहीबार १८:४१:७ | किरण लोहनी

गोरखा – गोरखामा ओडारमा लुकाएर राखेको १६ किलो सुन प्रहरीले बरामद गरेको छ ।

धार्चे गाउँपालिका वडा नम्बर–३, खोर्लाबेसीमा ओडारमा लुकाएर राखेको सुनका १६ वटा बिस्कुट बरामद भएको प्रहरी प्रमुख एसपी ओमप्रसाद अधिकारीले बताउनुभयो ।

मनासलु पदमार्ग नजिकै ओडारभित्र लुकाइराखेको सुन बिहीबार बिहान भेटिएको हो । पहराको ओडारभित्र बोरामा ढुंगाले चेपेर राखिएको अवस्थामा सुन बरामद गरिएको उहाँको भनाइ छ ।

गएको असार ११ गते रातिदेखि हराइरहेका धार्चे गाउँपालिका केरौंजाका धनकमल गुरुङले ओडारमा सुन लुकाएको प्रहरी स्रोतले जनाएको छ । प्रहरी प्रमुख अधिकारीले भने यसबारे अहिल्यै केही बताउन चाहनु भएन । गोरखाको धार्चे गाउँपालिका–१, यारुबगरमा व्यापार गरी बस्ने धनकमल गुरुङ असार ११ गते रातिदेखि सम्पर्कविहीन भएका थिए ।

यारुबगरबाट आफ्नै खच्चड धपाउँदै माछाखोलाभन्दा पारिसम्म आइपुगेका उनलाई त्यही रात नचिनेका ५–६ जनाको समूहले अपहरण गरेको आशंकामा प्रहरीले अनुसन्धान गरिरहेको थियो ।

व्यवसायी धनकमलले खच्चडमा सुन ल्याएको जानकारी पाएपछि प्रहरीले उनको खोजी गरिरहेको थियो । बुधबार प्रहरीले पक्राउ गरेका धनकमलको बयानका आधारमा बिहीबार ओडारबाट सुन बरामद गरिएको प्रहरीले जनाएको छ ।

तिब्बतबाट खच्चडमा ल्याएको सुन लुटेराले लुट्न खोजेपछि धनकमलले नै सुन लुकाएको प्ररम्भिक अनुसन्धानबाट खुलेको प्रहरीले जनाएको छ । त्यही प्रकरणमा संलग्न भएको आशंकामा प्रहरीले असार १४ गते ३ जना र १६ गते १ जनालाई नियन्त्रणमा लिएर अनुसन्धान गरिरहेको छ ।

अजिरकोट गाउँपालिका–३, का लोकबहादुर गुरुङ, सिरानचोक गाउँपालिका–२, का किरण भनिने करण गुरुङ र काठमाण्डौ महानगरपालिका–१९, का कृष्ण शाहीलाई प्रहरीले गएको असार १४ गते नियन्त्रणमा लिएको थियो ।

उनीहरुको बयानका आधारमा धार्चे गाउँपालिका–३, का विपिन गुरुङ असार १६ गते पक्राउ परेका थिए । गोरखा सदरमुकामबाट पक्राउ परेका उनीहरुको अहिले बरामद भएको सुन प्रकरणमा कस्तो खालको संलग्नता रहेको भन्नेबारे खुलिसकेको छैन । तर उनीहरुलाई प्रहरीले सार्वजनिक शान्तिविरुद्धको मुद्धा चलाएर अनुसन्धान गरिरहेको छ ।

खच्चडमा सुन ओसारपसार गर्ने मुख्य व्यक्ति धनकमल गुरुङ पक्राउ परेपछि घटना थप रहस्यमय बनेको छ । गुरुङलाई जिल्ला प्रहरी कार्यालयमा ल्याएर थप अनुसन्धान गरिने प्रहरी प्रमुख एसपी ओमप्रसाद अधिकारीले बताउनुभयो ।

यसअघि गएको वर्षको भदौ २३ गते प्रहरीले सुन ओसारपसार गरिरहेका छेकम्पारका दुई जनालाई नियन्त्रणमा लिएको थियो । उनीहरुको साथबाट सिर्दिवास प्रहरीले १० किलो सुन बरामद गरेको थियो ।

याे पनि पढ्नुहाेस्

गोरखामा ओडारमा लुकाएर राखेको १६ किलो सुन बरामद

अन्तिम अपडेट: मंसिर २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।