याेगेश भट्टराई : विद्यालय कमिटीदेखि पर्यटन मन्त्रीसम्म

साउन १५, २०७६ बुधबार १५:३२:९ | उज्यालो सहकर्मी

संस्कृति, पर्यटन तथा नागरिक उड्डयन मन्त्रीमा योगेश भट्टराई नियुक्त हुनु भएकाे छ । गएकाे प्रतिनिधसभा चुनावमा ताप्लेजुङबाट निर्वाचित भट्टराईलाई प्रधानमन्त्री केपी शर्मा ओलीले मन्त्रीमा नियुक्त गर्नुभएकाे हाे ।

गएकाे फागुन १५ गते हेलिकप्टर दुर्घटनामा तत्कालीन मन्त्री रवीन्द्र अधिकारीकाे निधन भएपछि याे मन्त्रालय प्रधानमन्त्री आफैले सम्हाल्दै आउनुभएकाे थियाे ।

नेपाल भ्रमण वर्ष -२०२० नजिकिँदै गर्दा रिक्त रहेकाे सम्बन्धित मन्त्रालयमा मन्त्री नियुक्त गर्न पार्टी भित्रैबाट दबाब थियाे । प्रधानमन्त्री ओलीले भट्टराईलाई पर्यटन मन्त्री बनाउने विषयमा पार्टीका अर्का अध्यक्ष पुष्पकमल दाहाल प्रचण्ड, वरिष्ठ नेता माधवकुमार नेपाल, नेता झलनाथ खनाल लगायतका नेताहरुसँग छलफल नै गर्नुभएकाे थियाे । नेताहरुसँगको सल्लाहमा प्रधानमन्त्री ओलीले भट्टराईलाई संस्कृति, पर्यटन तथा नागरिक उड्डयन मन्त्रालयको जिम्मेवारी दिनुभएकाे हाे ।

यसअघि चुनावका बेला ताप्लेजुङमा भएकाे चुनावी सभामा ओलीले 'याेगेशलाई जिताएर पठाउनुस् मन्त्री बनाउने काम मेराे भयाे' भन्ने अभिव्यक्ति नै दिनुभएकाे थियाे ।

भट्टराईले नेपाली कांग्रेसका उम्मेद्वार केशवप्रसाद दाहाललाई २ हजार भन्दा बढी मतले पराजित गर्दै प्रतिनिधिसभा सदस्यमा विजयी हुनुभएकाे थियाे । भट्टराईकाे १९४८९ मत आउँदा दाहालले १६८८८ मत ल्याउनुभएकाे थियाे ।

२०६४ र २०७० सालको पहिलो र दोस्रो संविधानसभा चुनावमा काठमाण्डाै क्षेत्र नम्बर ६ बाट पराजित भएका नेकपा युवा नेता भट्टराई गएकाे चुनावमा भने आफ्नै जन्मथलो ताप्लेजुङबाट विजयी हुनुभएकाे हाे ।

भट्टराईकाे राजनीतिक यात्रा

२०२३ साल भदौ २१ गते ताप्लेजुङको साँगुमा भीमलाल भट्टराई र महेन्द्रादेवी भट्टराईको कोखबाट जन्मिएका भट्टराईले समाजशास्त्र र मानवशास्त्र विषयमा एमए उत्तीर्ण गर्नुभएको छ ।

वाममन्थी पारिवारिक पृष्ठभूमि र झापा विद्रोहको प्रभावले राजनीतिमा प्रवेश गरेका भट्टराईको राजनीति एमालेको भ्रातृ सङ्गठन अनेरास्ववियुबाट सुरु भएको हो । २०३७ सालमा अनेरास्ववियुको विद्यालयको प्रारम्भिक कमिटी हुँदै क्याम्पस कमिटी रहेर काम गरेका भट्टराई २०५१ सालमा अनेरास्ववियूको अध्यक्ष हुनुभएको थियो ।

त्यसपछि नेकपा एमालेको जिल्ला कमिटी, अञ्चल कमिटी हुँदै केन्द्रीय सदस्यसम्म पुग्नुभएको थियाे । उहाँले तत्कालीन नेकपा एमालेको केन्द्रीय सचिव तथा प्रचार विभाग प्रमुख भएर पनि जिम्मेवारी सम्हालिसक्नुभएकाे छ । तत्कालीन एमाले र माओवादीकाे एकतापछि बनेकाे नेपाल कम्युनिष्ट पार्टीमा भने भट्टराई केन्द्रीय सदस्यकाे जिम्मेवारीमा हुनुहुन्छ ।

अन्तिम अपडेट: मंसिर २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्