लमजुङको दोर्दी गाउँपालिकाले दियो सीप र जाँगर भएका युवालाई गाउँमै रोजगारी !

भदौ ११, २०७६ बुधबार १७:२८:५८ | श्यामशितल परियार

लमजुङ– टाउकोमा सेतो रंगको हेल्मेट । खुट्टामा लामो, कालो बुट । पछाडि ‘दोर्दी गाउँपालिका, लमजुङ’ लेखिएको पातलो, हाफ ज्योकट लगाएका ।

एक जनाको हातमा गैँची । अर्का दुई जनाको हातमा बेल्चा । गैँची, बेल्चाको सहारामा तीनै जना युवा भदौ महिनाको चर्को घामको बेवास्ता गर्दै सडकको नाली सफा गर्नमै व्यस्त छन् ।

नालीमा थुप्रिएका ढुंगा, माटो हटाउन जुटेका उनीहरु दोर्दी गाउँपालिका–४, का स्थानीय युवा हुन् । उनीहरुलाई दोर्दी गाउँपालिकाले ३ महिनाका लागि ‘सडक हेरालु’को रुपमा रोजगारी दिएको छ ।

दोर्दी गाउँपालिकामा ९ वटा वडा रहेको छ । सबै वडामा ३/३ जना गरी गाउँपालिकाभरीमा २७ जना युवाले ३ महिनाका लागि ‘सडक हेरालु’को रुपमा रोजगारी पाएका छन् ।

सबै वडाबाट सिफारिस भइ आएका, हातमा सीप र मनमा जोश जाँगर भएका युवालाई छनौट गरी गएको भदौ ५ गतेदेखि काममा खटाइएको दोर्दी गाउँपालिकाका अध्यक्ष ओमबहादुर गुरुङले बताउनुभयो ।

उहाँका अनुसार ‘सडक हेरालु’ले नाला सरसफाई, सडकका खाल्डाखुल्डी पुर्नुका साथै सडकमा रहेका पानी कटाउने काम गरी सडक सञ्चालनमा सघाउ पुर्याउने छन् ।

‘गाउँपालिकामा खासै धेरै पक्की सडक छैन्, कच्ची सडक भएकाले बर्खाको समयमा सडक सञ्चालनमा समस्या हुँदा नागरिकले सास्ती खेप्नुपर्ने अवस्थाको अन्त्य गरी सहज रुपमा सडक सञ्चालन गर्नका लागि गाउँपालिकाले ३ महिनाका लागि सडक हेरालुको व्यवस्था गरेको हो,’ उहाँले भन्नुभयो ।

मासिक १५ हजार तलब सडक हेरालुका लागि गाउँपालिकाले चालु आर्थिक वर्षमा १५ लाख रुपैयाँ बजेट छुट्याएको छ । सडक हेरालुले मंसिर ५ गतेसम्म काम गर्नेछन् ।

दैनिक बिहान १० बजेदेखि साँझ ५ बजेसम्म उनीहरु सडककै काममा खटिन्छन् । सरकारी बिदाको दिन उनीहरुले काम गर्नुपर्दैन । सडक हेर्नेलाई मासिक १५ हजार रुपैयाँ तलब दिइएको छ ।

गाउँघरमै रोजगारी पाउँदा युवाहरु खुशी भएका छन् । ‘खाली समयको सदुपयोग हुने, आम्दानी पनि हुने । गाउँघरमै यसरी रोजगारी पाउँदा खुशी छौँ,’ नौथर शेरा हुँदै साँदीखोला पाचोक जाने सडकको नाली सफाइमा जुटेका नौथर शेराका सडक हेरालु रामबहादुर तामाङले खुशी हुँदै भन्नुभयो ।

आफूहरुले आवश्यक सामग्रीका साथै एकदिने तालिमसमेत पाएको कुमबहादुर रम्तेलले बताउनुभयो । गाउँपालिकाका अनुसार अहिले २७ जना युवा आ–आफ्ना वडामा रहेका सडकको काममा खटिएका छन् ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्