सुुर्खेतकाे जंगलमा मरेका गाईगाेरुका विषयमा छानबिन गर्न नेपालगञ्जमा समिति गठन

भदौ १४, २०७६ शनिबार २०:१०:५५ | गोविन्द शर्मा

बाँके - नेपालगन्जको काञ्जिहाउसबाट छाडा पशु चौपाय दैलेख लैजाने क्रममा सुर्खेतको जंगलमा मृत भेटिएको विषयमा छानबिनका लागि नेपालगञ्ज उपमहानगरपालिकाले समिति गठन गरेको छ ।

नेपालगञ्ज उपमहानगरपालिका कार्यवाहक मेयर तथा उपमेयर उमा थापा मगरको अध्यक्षतामा शनिबार बसेको नगर कार्यपालिकाको बैठकले घटनाका सम्बन्धमा स्थलगत अध्ययन गरी सत्यतथ्य सार्वजनिक गर्न नेपालगञ्ज उच्च अदालत बार एशोसिएसनका अध्यक्ष अधिवक्ता विकास आचार्यको अध्यक्षतामा छानबिन समिति गठन गरेको छ ।

समितिमा अधिकारकर्मी बिश्वजित तिवारी, अधिवक्ता वसन्त गौतम, पत्रकार पूर्णलाल चुके, पशु स्वास्थ्य चिकित्सक, जिल्ला प्रशासन कार्यालय बाँकेका प्रतिनिधि सदस्य र उपमहानगरपालिकाका वरिष्ठ अधिकृत खिमानन्द अर्याल सदस्य सचिव रहनुभएकाे छ । समितिले निष्पक्ष छानबिन गरी १५ दिनभित्र प्रतिवेदन बुझाउने छ ।

प्रतिवेदनको आधारमा दोषीलाई हदैसम्मको कारबाही गरिने कावा मेयर मगरले बिश्वास दिलाउनुभएको छ । सर्वदलीय, सर्वपक्षीय बैठक समेतको निर्णयका आधारमा जिल्ला प्रशासन कार्यालय बाँकेसँगको समन्वयमा पवित्र उद्धेश्यका साथ छाडा पशु चौपाय दैलेख पठाउन लगिएकोमा सुर्खेतस्थित कट्कुवाको जंगलमा छोडिनुलाई गम्भिरताका साथ लिँदै उपमहानगरपालिकाले क्षमायाचना समेत गरेको छ ।

उप–महानगरपालिकाका वडा नम्बर २१ पुरैनीमा छाडा पशु चौपाया व्यवस्थापनका लागि अस्थायी रुपमा निर्माण गरिएको काञ्जिहाउसमा रहेकामध्ये २९१ गाई वस्तुलाई नेपालगञ्जदेखि दैलेख स्थानान्तरण गर्ने पवित्र उद्देश्यका साथ लगिएकोमा केही गाईवस्तुहरु सुर्खेतको कटकुवा भन्ने स्थानमा मृत भेटिएको खबरले उपमहानगरपालिका कार्यपालिका अत्यन्त दुखित भएको बैठकपछि कावा मेयर मगरले बताउनुभयो ।

गाई वस्तु पुर्‍याएर फर्केलगत्तै केही पशु चौपायाको मृत्य भएको जानकारी पाएपछि सुर्खेत प्रहरी, प्रशासन र स्थानीय तहसँगकाे समन्वयमा मृतक गाईको उचित व्यवस्थापन, घाइतेको उपचार लगायतका कार्य भइरहेको भन्दै उहाँले सुर्खेत जंगलमा छोडिएकामध्ये शनिबार साँझसम्म १६६ गाईवस्तु नेपालगञ्जकाे काञ्जिहाउसमा फिर्ता ल्याइएको जानकारी दिनुभयो ।

उपमहानगरपालिकाले नेपालगञ्ज आफैँमा धार्मिक तथा सामाजिक रुपमा अति संवेदनशील शहर भएको भन्दै सम्पूर्ण नगरवासीमा संयमताका लागि अपिल गरेको छ । साथै उपमहानगरपालिकाले शान्ति, सद्भाव, सहयोग, सहकार्य र सहिष्णुतालाई अझ बढी प्रगाढ बनाइराख्न आम नगरवासीमा अनुरोध समेत गरेको छ ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

गोविन्द शर्मा

गोविन्द शर्मा बाँकेका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्