ट्राफिक नियमको पालना गरी सभ्य नागरिकको परिचय दिऔँ

चैत ४, २०७६ मंगलबार १७:३०:३४ | जीवनकुमार श्रेष्ठ

काठमाण्डौ – काठमाण्डौ उपत्यकाको पहिलो आधुनिक सडक हो, जडीबुटी –सूर्यविनायक सडक खण्ड । यस सडकखण्डमा ६ लेन छन् जसमध्ये चार वटा लेन मुख्य सडक र दुई वटा सहायक लेन हुन् ।

यो सडकखण्ड प्रयोग गर्ने सर्वसाधारण, चालक, सहचालक, यातायात व्यवसायी, सरोकारवाला निकाय र स्थानीयसँगको छलफलपछि यो सडक खण्डलाई नमुना सडक बनाउने भनेर अन्तर्राष्ट्रिय नियमलाई अनुसरण गर्ने भनेर निर्णय गर्यौँ । त्यसै अनुसार गएको फागुन १४ गते जडीबुटी–सूर्यविनायक सडकखण्डमा लेन नियम लागू भयाे ।

अन्तर्राष्ट्रिय नियम र प्रचलन अनुसार यात्रुवाहक गाडी, मिनि बस, माइक्रो बस र मालवाहक गाडीहरु बिस्तारै गुड्छन् र ती सबै गाडीहरु बायाँ अथवा देब्रे लेनबाट चलाउनुपर्छ । त्यस्तै नरोकिइ र छिटो चल्ने गाडीहरु दाँया अथवा दाहिने लेनबाट चलाउनुपर्छ ।

यो नियम विश्वमा सबैतिर पालना हुन्छ । यसलाई हामी पनि पालना गराैँ भनेर ट्राफिक प्रहरीले यो नियम लागू गर्‍यो जुन अहिले निकै प्रभावकारी भइरहेको छ ।
यो नियम लागू गर्नुको मुख्य उद्देश्य दुर्घटना न्यूनीकरण गर्नु र जाम हटाउनु हो । सबैभन्दा महत्वपूर्ण भनेको सडक सभ्यता कायम गर्नु हो ।

यो नियम लागू भएपछि त्यो सडकखण्डमा भइरहेको जाम पनि कम भएको छ । जथाभाबी गाडी, मोटरसाइकल चलाउँदा भएका दुर्घटना पनि कम भएको पाएका छौँ ।
यो सडकखण्डमा लागू भएको नियम कार्यान्वयन भएको वा नभएको अनुगमन गर्न स्थानीय प्रहरी र ट्राफिक प्रहरी महाशाखाबाट प्रहरी नायब उपरीक्षक (डीएसपी) को राेहबरमा अनुगमन टोली पनि गठन गरेको थियाे । जसले १० दिन यो नियमको पालना भए वा नभएको, कत्तिको प्रभावकारी रहेको जस्तो अनुगमन गरेको थियो ।
अनुगमनका क्रममा प्रायः काठमाण्डौ उपत्यकाबाहिरबाट आएका गाडी र केही चालकबाहेक सबैले यो नियम पालना गरेको पाइएको छ । यस नियमको पालना र कार्यान्वयनको प्रभावकारिताका बारेमा अहिले त्यहाँ रहेको स्थानीय प्रहरी र ट्राफिक प्रहरीले निरन्तर निरीक्षण गरिरहेको हुन्छ र गरिरहेको छ ।

अहिले हामीले यो नियमको पालना नगर्ने चालकलाई कारबाहीको प्रक्रियामा ल्याएका छौँ । म यो नियमको पालना गराैँ र कारबाहीको भागीदार नबनौँ भनेर ट्राफिक प्रहरीको तर्फबाट अनुरोध पनि गर्न चाहन्छु ।

ट्राफिक प्रहरीले यही सडकखण्डमा लागू गरेको लेन नियमलाई गएको आइतबारबाट कोटेश्वर–कलङ्की सडकखण्डमा पनि लागू गरेको छ । पहिलो चरणको छलफलको निष्कर्ष अनुसार कोटेश्वर–कलङ्की सडकखण्डमा पनि लेन नियम लागू गरिएको हो ।

यसलाई प्रभावकारी बनाउन विभिन्न सन्देशसहितको ब्यानरहरु बनाएर राखेका छौँ । कोटेश्वर–कलङ्की सडकखण्डमा पनि जडीबुटी–सूर्यविनायक सडकखण्डमा जसरी नै गाडीहरु गुड्छन् ।

यो सडकखण्ड नेपालको सबैभन्दा आधुनिक सडक खण्ड हो । यस सडकखण्डमा राम्रो सर्भिस ट्रयाक छ ।

यो नियममा लागू भएको स्थानमा सबैले आफ्नो गाडीको वर्गीकरणलाई बुझेर बायाँ र दायाँ लेन छानेर गुड्नुपर्छ । फेरि बायाँ लेनमा गुड्ने गाडी दायाँ आउन नपाउने र दायाँ लेनमा चल्ने गाडीले बाँया लेनमा जानै नपाउने भन्ने होइन । गाडीहरुले सुरक्षित रुपमा ओभरटेक गरी अर्काे लेन प्रयोग गर्न पाँउछन् । तर त्यही लेनमा चल्न पाउँदैनन् । ओभर टेक गरिसकेपछि फर्किएर सुरक्षित रुपमा आफ्नै लेनमा आउनुपर्छ ।

यो नियमले सडकलाई मर्यादित बनाउनुको साथै सबैलाई अनुशासित र सभ्य हुन मद्दत पनि गर्छ । यसको सबैलाई फाइदा छ ।

सडकमा भाडा र मालवाहक गाडीहरुले दायाँ लेन प्रयोग गरेर गुड्दा ती गाडी रोकिँदा छिटो गुड्ने गाडीले पनि रोकिने गर्नुपरेको छ । यसले सडकमा जाम हुनुका साथै यात्रुले पनि असुरक्षित तरिकाले यात्रा गर्नुभएको हुन्छ । यो नियमले यात्रुलाई सुरक्षित रुपमा गाडी चढ्न र गाडीबाट झर्न सहयोग गर्छ । दायाँ र बायाँ लेनको वास्ता नगरि गाडी हाँक्ने चालकलाई संयमित बनाउँछ ।

त्यसैले सबै नागरिक, यातायात व्यवसायी, व्यक्ति, भाडा र मालवाहक गाडी, मोटरसाइकल चलाउने चालकहरुलाई ट्राफिक प्रहरीको तर्फबाट म नियम पालना गर्न अनुरोध गर्छु । ट्राफिक प्रहरीले यो नियमको बारेमा केही दिन जानकारी दिनेछ र त्यसपछि नियम नमान्ने चालकहरुलाई सवारी तथा यातायात ऐन अनुसार कारबाही पनि गर्नेछ ।

त्यसैले सबैजनाले कारबाहीमा पर्नुको साटो ट्राफिक नियमको पालना गरी सुरक्षित, अुनशासित, र मर्यादित भइ सडक सभ्यताको परिचय दिनु हुन अनुरोध गर्दछु ।

अन्तिम अपडेट: मंसिर १९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

जीवनकुमार श्रेष्ठ

प्रहरी उपरीक्षक श्रेष्ठ ट्राफिक प्रहरी प्रवक्ता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्