म्याग्दीमा बुधबार २ जना डेंगी सङ्क्रमित थपिए, सङ्क्रमितको सङ्ख्या ७ पुग्यो

वैशाख २४, २०७७ बुधबार २१:०:२९ | प्रताप बानियाँ

म्याग्दी – हिमाली जिल्ला म्याग्दीमा आज थप २ जनामा डेंगीको सङ्क्रमण पोजिटिभ पाइएको छ । उच्च ज्वरो आउनु, शरीरमा जाडो हुनु र जोर्नीहरु दुख्न थालेपछि ल्याब परीक्षण गर्दा उनीहरुमा डेंगी रोगको सङ्क्रमण पोजिटिभ देखिएको बेनी अस्पतालले जनाएको छ ।

तनहुँ जिल्ला घर भइ हाल बेनी नगरपालिका–७, मंगलाघाट बस्ने २८ वर्षीय युवा र मंगला गाउँपालिका–१, कुहुँका २५ वर्षीय युवामा डेंगी पोजेटिभ देखिएको बेनी अस्पतालका मेडिकल रेकर्डर सुपरभाइजर प्रकाश शर्माले जानकारी दिनुभयो । उहाँका अनुसार अहिले दुवै जनाको चिकित्सकको निगरानीमा उपचार भैरहेको छ भने स्वास्थ्य अवस्था सामान्य रहेको जनाइएको छ ।

बुधबार थपिएका दुई जनासहित म्याग्दीमा डेंगी सङ्क्रमितको सङ्ख्या ७ पुगेको छ । गत आइतबार बेनपाको अर्थुङ्गे, पुलाचौर र घतानमा एकएक जनामा डेंगी पोजिटिभ भेटिएको थियो ।

यसअघि डेंगी पोजिटिभ देखिएका बेनपाको एकजना सङ्क्रमितलाई थप उपचारका लागि पोखरा रिफर गरिएको बेनी अस्पतालका सूचना अधिकारी समेत रहनुभएका मेडिकल रेकर्डर शर्माले बताउनुभयो ।

पछिल्लो तथ्याङ्क अनुसार बेनी नगरपालिकामा ४, मंगला गाउँपालिकामा २ र मालिकामा १ जनामा डेंगी देखिएको बेनी अस्पतालले जनाएको छ । कोभिड–१९ का विरुद्ध लकडाउन जारी रहेको अवस्थामा जिल्लाको ग्रामीण क्षेत्रमा नै डेंगीका सङ्क्रमितहरु भेटिनुले समयमै सचेत बन्नुपर्ने चिकित्सकहरु बताउँछन् ।

पछिल्लोपटक डेंगीका सङ्क्रमितहरु बढ्दै जान थालेपछि जिल्ला डेंगीरोगको उच्च जोखिममा परेको छ ।

यसैबीच म्याग्दीमा डेंगीको सङ्क्रमितहरु बढ्दै गएपछि स्थानीय तहले सचेतनामूलक कार्यक्रमहरु सुरु गरेका छन् । वडास्तरीय कार्ययोजना निर्माण गरी टोलटोलमा अभियान सञ्चालन गरिएकोे छ ।

डेंगीले प्रकोपको रूप लिन सक्ने जोखिमपूर्ण अवस्थालाई मध्यनजर गरी नगर भित्रका वडाहरुमा सचेतनामूलक कार्यक्रमसहित डेंगीरोग नियन्त्रण गर्न लामखुट्टेको बासस्थान खोजी र नष्ट गर्ने अभियान थालिएको हो ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्