कैलाली - सुदूरपश्चिममा जेठ महिनाको २४ दिनमा दुई सय ५९ जना कोरोना सङ्क्रमित थपिएका छन् । जेठ ९ गतेदेखि जेठ ३२ गतेसम्म दुई सय ५९ जना सङ्क्रमित थपिएका हुन् । त्यसअघि सुदूरपश्चिममा जम्मा पाँच जना कोरोना सङक्रमित थिए ।

सुदूरपश्चिम प्रदेशमा गएको चैत १४ गते पहिलो कोरोना सक्रमित फेला परेका थिए । धनगढी उपमहानगरपालिका ५ का ३४ वर्षीय पुरुषमा कोरोना पुष्टि भएको थियो ।

त्यसपछि चैत २२ गते थप तीन जनामा कोरोना पुष्टि भएको थियो । धनगढी उपमहानगरपालिका ५ की ३४ वर्षीया महिला, कैलाली लम्कीका २१ वर्षीय युवक र कञ्चनपुरको बेदकोट नगरपालिकाका ४१ वर्षीय युवकमा कोरोना पुष्टि भएको थियो ।

वैशाख १ गते लम्कीचुहा नगरपालिका १ की ६१ वर्षीया महिलामा कोरोना पुष्टि भएको थियो । त्यसपछि जेठ ९ गते सुदूरपश्चिमका पाँच जना नयाँ सङ्क्रमित फेला परेका थिए भने त्यसपछि दैनिक रुपमा सङ्क्रमितको सङ्ख्या बढ्दै गएको हो । अहिले प्रदेशमा सङ्क्रमितको सङ्ख्या दुई सय ६४ पुगिसकेको छ । 

जेठमा मात्रै भारतबाट एक लाख १६ हजार बढी नेपाली सुदूरपश्चिम फर्किएका छन् भने उनीहरुमध्ये चार हजारको मात्रै कोरोना परीक्षण भएको छ ।