सुदूरपश्चिम सरकारको तथ्याङ्क नै नक्कली, भेन्टिलेटर नभएको अस्पतालमा दुईवटा भेन्टिलेटर

असार १८, २०७७ बिहीबार ८:३:४० | सीताराम ओझा

कैलाली – प्रदेशको सामाजिक विकास मन्त्रालयले पठाउँदै आएको तथ्याङ्कमा असार १३ गतेसम्म सुदूरपश्चिम प्रदेशमा १४ शैयाको आईसीयू कक्ष र १० वटा भेन्टिलेटर उपलब्ध रहेको जानकारी दिइएको थियो ।

महाकाली अस्पतालमा दुई वटा भेन्टिलेटर उपलव्ध रहेको भन्दै एक महिनासम्म जानकारी दिंदै आएको मन्त्रालयले असार १४ मा भने एउटा पनि भेन्टिलेटर उपलब्ध नभएको तथ्याङ्क पठाएको थियो । १४ असारदेखि नयाँ तथ्याङ्क सार्वजनिक भएसँगै महाकालीमा चार शैयाको आईसीयू र दुई वटा भेन्टिलेटर रहेको भन्नेबारे सामाजिक विकास मन्त्रालय र स्वास्थ्य निर्देशनालयले नक्कली विवरण दिंदै आएको पुष्टि भएको हो ।

अस्पतालमा भेन्टिलेटर नै नभएको महाकाली अस्पतालका सूचना अधिकारी नारद प्रसाद भट्टले बताउनुभयो । यस्तै अस्पतालमा आईसीयू बेड राखिएको भए पनि सञ्चालनमा नआएको उहाँको भनाइ छ ।

सुदूरपश्चिममा कोरोना देखिएदेखि नै प्रत्येक दिन नक्कली विवरण दिदै आएको प्रदेश सरकार र मन्त्रालयकै चरम लापरवाहीका कारण बुधबार एक बालकको ज्यान गएको छ । कञ्चनपुरको भीमदत्त नगरपालिका–१६ का १४ वर्षीय पर्वत गिरीलाई बुधबार बिहान सर्पले टोकेपछि महाकाली अस्पतालमा उपचारका लागि लगिएकोमा त्यहाँ भेन्टिलेटर नभएकै कारण उनको ज्यान गएको आफन्तहरुले बताएका छन् ।

महाकाली अस्पतालमा आईसीयू र भेन्टिलेटर उपलब्ध छ भनेरै नै उनलाई त्यहाँ पुर्याइएको थियो । बेहोस अवस्थामा रहेका बालकलाई महाकाली अस्पताल पुर्‍याइएकोमा अस्पतालले भेन्टिलेटर र आइसीयू नभएको भन्दै धनगढी रेफर गरिदिएको अस्पतालका सूचना अधिकारी भट्टले बताउनुभयो । तर बालकलाई सेती प्रादेशिक अस्पतालमा पुर्याउनै नपाइ बीच बाटोमै ज्यान गएको हो ।

प्रदेश सरकारले नक्कली विवरणहरु दिएका कारण बालकले ज्यान गुमाउनु परेको भन्दै सामाजिक सञ्जालमा पनि प्रदेश सरकारको चर्को आलोचना भइरहेको छ ।

सामाजिक विकास मन्त्रालयको स्वास्थ्य महाशाखा प्रमुख नरेन्द्र कार्कीले भेन्टिलेटर खरिदको चरणमा रहेको बताउनुभयो । उहाँले हाललाई महाकालीमा भेन्टिलेटर सेवा सञ्चालनमा नरहेको स्वीकार गर्नुभयो ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सीताराम ओझा

सीताराम ओझा कैलालीका उज्यालाे सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्