सङ्खुवासभा पहिरो अपडेट : बेपत्ता ११ को खोजी हुँदै, पीडितलाई चित्रेबाट बुधबारे सारियो

 असार ३१, २०७७ बुधबार १६:२९:२१ | नवीन गुरुङ
unn.prixa.net

सङ्खुवासभा – सङ्खुवासभाको सिलिचोङ गाउँपालिका १ बेसिन्दा गाउँका पहिरो पीडितहरुलाई सिसुवाटारको बुधबारे बजारमा सारिएको छ ।

गएको शनिबार रातिकाे वर्षाकाे कारण पहिराे जाँदा सिलिचोङ गाउँपालिका १ बेसिन्दा गाउँका नाै घर बगाउनुका साथै १५ जना बेपत्ता भएका थिए ।

बेपत्ता भएका १५ जनामध्ये उद्धार गरिएका चार जनाको जिल्ला अस्पतालमा खाँदबारी उपचार भइरहेको छ । अविरल वर्षाले जमिन चिरा-चिरा बनाएपछि पीडितहरुलाई बेसिन्दाभन्दा केहीमाथिको सुरक्षित मानिएको चित्रे भन्ने ठाउँमा सारिएको छ ।

बेसिन्दा गाउँका ७३ घर परिवारका तीन सय ५० जनाभन्दा बढीलाई तत्कालकाे लागि चित्रेमा सारिएको थियो । बाक्लो हुस्सु र पानी परिरहेकाे कारण चित्रेमा हेलिकप्टर अवतरण हुन नसकेपछि पीडितहरुकाे सुरक्षालाई मध्यनजर गर्दै सिलिचोङ गाउँपालिका २ मा पर्ने सिसुवाटारको बुधबारे बजारमा सारिएको हो । 

गाउँपालिका अध्यक्ष रामबहादुर कुलुङले सुरक्षाकाे हिसाबले वृद्धावृद्धा र बालबालिकाहरुलाई समस्या हुने देखिएपछि बुधबारे बजारमा सारिएको जानकारी दिनुभयो । 

पहिरोमा परेर हराइरहेका ११ जनाकाे चार दिनदेखि खोजी भइरहेको सङ्खुवासभाका प्रहरी नायब उपरीक्षक (डीएसपी) नवराज मल्लले बताउनुभयो । 

चार दिनदेखि प्रहरी १५ जना, सशस्त्र १५ र नेपाली सेना ३० गरी ६० जना सुरक्षाकर्मी र स्थानीयहरुले खोजी गरिरहेको उहाँले बताउनुभयो । प्रदेश सरकारमार्फत राहत सामग्री बोकेर चित्र पुगेको हेलिकप्टर दुई दिनसम्म पनि अवतरण हुने नसकेकाे हाे । 

अन्तिम अपडेट: साउन १, २०७७

नवीन गुरुङ

संखुवासभाका पत्रकार नवीन गुरुङ उज्यालोका जिल्ला सम्बाददाता हुनुहुन्छ । 

तपाईको प्रतिक्रिया