प्रधानमन्त्रीलाई बाबुराम भट्टराईकाे प्रश्न : यो राम मन्दिर बनाउने बेला हो कि अस्पताल ?

साउन ३०, २०७७ शुक्रबार १६:१८:२४ | किरण लोहनी

गोरखा – पूर्वप्रधानमन्त्री एवं जनता समाजवादी पार्टीका वरिष्ठ नेता डाक्टर बाबुराम भट्टराईले कोरोना सङ्क्रमण रोकथाम र व्यवस्थापनमा सरकार असफल भएको बताउनुभएको छ ।

चार महिनासम्मको लकडाउनमै सङ्क्रमण रोकथाम, नियन्त्रण र व्यवस्थापनको व्यापक तयारी हुनुपर्नेमा सरकार चुकेको उहाँको भनाइ छ । गोरखा अस्पताललाई स्वास्थ्य उपकरण हस्तान्तरण गर्न शुक्रार गृह जिल्ला आउनुभएका भट्टराईले पत्रकारहरुसँग कुरा गर्दै व्यापक रुपमा परीक्षण गर्ने, क्वरेण्टीनको व्यवस्था गर्ने, बिरामीहरुको लागि आवश्यक पर्ने भेन्टिलेटर लगायत उपकरण व्यवस्थापनमा सरकारले प्रभावकारी काम गर्न नसकेको बताउनुभयो ।

कोरोना सङ्क्रमणको व्यवस्थापनको काममा अग्रभागमा खटिने स्वास्थ्यकर्मी र सुरक्षाकर्मीको सुरक्षाको सन्दर्भ तथा भारतसँगको सीमा विवादको विषयमा पनि सरकारले चासो नदिएको भट्टराइको भनाइ छ ।

‘रामभरोसाको भरमा सरकार अघि बढेको छ । नियोजित, व्यवस्थित र योजनाबद्ध ढङ्गले कुनै काम भएको देखिएको छैन’, भट्टराईले भन्नुभयो, ‘प्रत्येक परीक्षणमा पाँच प्रतिशत सङ्क्रमित भेटिएको छ, व्यापक रुपले परीक्षण गर्ने हो भने १० लाखभन्दा बढी सङ्क्रमित भेटिने खतरा छ, नागरिक आफैले आफ्नो सुरक्षामा ध्यान दिनुपर्ने देखिएको छ ।’

आगामी हिउँदसम्ममा विश्वव्यापी रुपमै कोरोना सङ्क्रमण अझै बढेर जाने विश्व स्वास्थ्य सङ्गठनलगायतको प्रक्षेपण रहेको र भारतमा तीव्र रुपमा सङ्क्रमण बढेकोले त्यसको प्रभाव नेपाललाई पनि पर्नेतर्फ सरकार गम्भीर बन्नुपर्ने उहाँले बताउनुभयो ।

तर सरकारले भने पार्टीभित्रको झगडामा मात्रै अलमलिएको भट्टराइको दाबी छ । ‘हामीले यस्ता नेता छानेका छौँ, कोरोनाको यस्तो बेला आफ्नो पार्टीको झगडाका लागि महिनौँ वार्ता गरेर बस्नुभएको छ’, उहाँले प्रश्न गर्नुभयो, ‘के हामी उहाँहरुको वार्ता कहिले हुन्छ भनेर कुरेर बस्ने हो, उहाँहरुको वार्ता डोनाल्ड ड्रम्प र सी जिनपिङको अथवा मोदी र ओलीको जस्तो ठान्दिनु पर्ने हो हामीले ?’

पार्टीको आन्तरिक झगडामा भन्दा पनि प्रधानमन्त्रीको प्राथमिकता अस्पताल बनाउने, भेन्टिलेटर आदिको व्यवस्थापन गर्नेतर्फ हुनुपर्नेमा उहाँ अयोध्या खोजेर बसिरहनुभएको छ भन्दै भट्टराईले आलोचना गर्नुभयो ।

‘यो बेला राममन्दिर बनाउने बेला हो कि अस्पताल ? उहाँहरु उल्टो दिशातिर गइरहनु भएको छ, देश र जनतालाई ठूलो धरापमा पारिरहनु भएको छ’, भट्टराईले भन्नुभयो ।

देश अहिले सरकारविहीनताको अवस्थामा रहेको उहाँको टिप्पणी छ । त्यसैले देशले अब केपी ओलीको विकल्प खोज्नुपर्ने र त्यसका लागि नागरिक समाज पनि अग्रसर हुनुपर्ने उहाँले बताउनुभयो । ‘केपी ओली जस्ता गैरजिम्मेवार मान्छे सत्तामा छन्, लहडको भरमा कुनै स्पष्ट नीति विना अघि बढ्छन्, सोच विचार पूर्ण नीति उनको छैन, यस्तो मान्छे नेतृत्वमा रहेसम्म देशले आगामी दिनमा दुःख मात्रै पाउनेवाला छ’, भट्टराईले भन्नुभयो, ‘यो नेकपाको आन्तरिक मामिला मात्रै हो भनेर चुप लागेर बस्ने अवस्था छैन, नेपाली जनताले नै आवाज उठाउनुपर्छ ।’

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण लोहनी

उज्यालोका गोरखा सम्वाददाता किरण लोहनी गोरखाको च्वाइस एफएममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

प्रधानमन्त्रीलाई बाबुराम भट्टराईकाे प्रश्न : यो राम मन्दिर बनाउने बेला हो कि अस्पताल ?

फाइल फाेटाे

तपाईको प्रतिक्रिया