कोरोनाको जोखिम बढेपछि चितवनका थारु समुदायले बनाए ‘चाडपर्व कार्यविधि’

भदौ २१, २०७७ आइतबार ७:३४:५८ | राधेश्याम खतिवडा

चितवन - कोरोनाको जोखिम बढ्दै गएपछि चितवनका थारु समुदायले चाडपर्व मनाउन कार्यविधि बनाएका छन् ।

थारु कल्याणकारिणी सभा जिल्ला कार्य समिति चितवनले जितिया, दशैं, तिहार, छठ, माघे सङ्क्रान्तिसहित चैते दशैंसम्मका पर्व मनाउन कार्यविधि बनाएर सार्वजनिक गरेको हो ।

‘चाडपर्वको रीत पूरा गरौँ, घरपरिवारमा सीमित भएर पर्व मनाऔँ र कोरोना सङ्क्रमणबाट बचौँ’ भन्ने मूल नाराका साथ ‘चितोनिया थारु’ समुदायको चाडपर्व कार्य विधि-२०७७’ जारी भएको हो ।

नेपाल सरकारले २०७७ वैशाख १ गतेदेखि २०७७ चैत्र मसान्तसम्मको सार्वजनिक बिदा तथा पर्व बिदासम्बन्धी मिति २०७६ चैत्र १७ गते राजपत्रमा प्रकाशित गरेको सूचनालाई आधार बनाएर कार्यविधि बनाइएको समितिका सभापति ललितकुमार चौधरीले बताउनुभयो ।

भिडभाड र सामूहिक रुपमा पर्व नमनाइ घर परिवारमा समिति रहेर कोरोनाबाट जोगिनका लागि कार्यविधि बनाएको पनि उहाँले बताउनुभयो । जितिया पर्वसँगै थारु समुदायमा चाडपर्व सुरु हुन्छन् । जितिया, यमोसा, दशैं, सोहोराइ तिहार, छठ, एकादशी, खिचरा, फगुवा, दशहरा पर्व कसरी मनाउने भनेर कार्यविधिमा उल्लेख गरिएको छ ।

कोरोनाको जोखिम रहेकाले रोग लागेर उपचार गर्नुभन्दा रोग नै लाग्न नदिनु उपयुक्त हुने भन्दै कार्यविधि बनाएको पनि समितिले जारी गरेको विज्ञप्तिमा उल्लेख छ । विज्ञप्तिमा भनिएको छ,‘हामी सुरक्षित रह्यौँ भने पूरै जिन्दगी मनोरञ्जन गर्दै चाडपर्व मनाउँदै गरौँला तर अहिले रीत मात्रै पूरा हुने गरी चाडपर्व मनाऔँ ।’

थारु समुदायले भाद्र कृष्ण अष्टमीमा जितिया पर्व मनाउँछन् । यो महिलाहरुले मनाउने पर्व हो । जितियामा सामूहिक नाच गान र पूजा हुन्छ । त्यसपछि सोह्रश्राद्धको अन्तिम दिन दिवंगत पितृको सम्झनामा ‘एमोसा’ मनाउँछन् ।

यसमा पनि सामूहिक रुपमा गर्नु पर्ने केही विधिहरु छन् । दशै अनि त्यसपछि तिहारका बेला हुने सोहराई पूजामा पनि घर परिवारमै सीमित हुन भनिएको छ । छठ, बड्का एकादशी ठूलो एकादशी माघे सङ्क्रान्तिको खिचरा, फागु र चैते दशैंसम्म सामूहिक भेटघाट र पर्वको अनुष्ठान नगर्न कार्य विधिमार्फत भनिएको छ ।

विज्ञ र अगुवाहरुलाई राखेर भर्चुअल बैठकमार्फत् छलफल गरेर निर्णय गरेको जानकारी दिँदै सभापति चौधरीले कार्यविधिमा समस्या भए व्याख्या गर्ने र थपघट गर्ने अधिकार समितिलाई भएको पनि बताउनुभयो । कोरोनाको सङ्क्रमण सकिएपछि कार्यविधि खारेज हुने सभापति चौधरीले बताउनुभयो ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राधेश्याम खतिवडा

राधेश्याम खतिवडा उज्यालोका चितवन सहकर्मी र नेपाल पत्रकार महासंघ चितवन शाखाका पूर्व अध्यक्ष हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्