पर्वत – पहिरो खसेर बन्द भएकाे मध्यपहाडी लोकमार्गको कुश्मा–बागलुङ सडक खण्ड ६ घण्टापछि एकतर्फ खुलेको छ । कुश्मा नगरपालिका १ को सहस्रधारामा आइतबार बिहान पहिरो जाँदा सडक बन्द भएको थियो । 

झण्डै पाँच सय मिटर सडक माथिबाट झरेको पहिरोले सडकको झण्डै ५० मिटर भाग पुरेर थियो । पहिरो हटाएर साँझ ६ बजेदेखि सडक एकतर्फी रुपमा सञ्चालनमा ल्याउन सकिएको जिल्ला ट्राफिक कार्यालय पर्वतका प्रमुख कृष्णबहादुर खड्काले जानकारी दिनुभयो ।    

आइतबार बिहान ६ बजेको समयमा पहिरो झरेपछि सडक बन्द भएको थियो । सडक बन्द भएपछि अत्यावश्यक कामका लागि आवात जावत गर्ने सर्वसाधारण समस्यामा परेका थिए । विशेषगरी बाग्लुङ, म्याग्दी र मुस्ताङमा उपचार हुन नसकेर पोखरा रेफर गरिएका बिरामीहरु समस्यामा परेका थिए ।