‘मर्नुअघि तिम्रो मुख हेर्ने धोको छ छोरा, जहाँ भए पनि एक पटक घर आउन ल’

मंसिर १४, २०७७ आइतबार २०:२:३२

रामकुमार थापा/धादिङ ।

धादिङ – वि.स २०७३ सालको नयाँ वर्षमा घर आउँछु भनेका धादिङ धुनिवेशी नगरपालिका–१, उप्रेती गाउँका राजन उप्रेती अझैसम्म पनि घर फर्कनुभएको छैन ।

जर्मनी गएको ९ महिनामै त्यहाँबाट फर्केका राजन काठमाण्डौ ओर्लिएर दिदी कल्पना पाठकको घर बसेर घर आउँछु भनेको ४ वर्ष भयो, तर अझै पनि अत्तोपत्तो छैन । छोरो राजन उप्रेती आउने बाटो कुरेर बस्नुभएकी आमा राधिका उप्रेतीका आँखा दिनभरि घरछेउकाे बाटाे हेर्दाहेर्दै थाक्छन् ।

घर सल्लाह गरेर पढ्नको लागि जर्मन गएका राजन गएको ९ महिनामा नेपाल फर्कनुपर्यो । राजनको जर्मन सोचजस्तो भएन । १२ लाख रुपँैया खर्च गरेर जर्मनी गएका राजन दुई पटकसम्म जर्मनीको विद्यालयमा परीक्षा दिँदा पनि सफल हुनुभएन । परीक्षामा सफल हुन नसकेपछि राजन जर्मनीमा भागेर काम गर्न थाल्नुभयो । त्यसरी विद्यार्थी भिसामा गएको र भागेर काम गरेको थाहा पाएपछि जर्मन प्रहरीले राजनलाई समातेर घर फर्काइदियो ।

सुन्दर सपना देखेर जर्मन जानुभएका राजनको वैदेशिक यात्रा सफल नभएपछि उहाँ चिन्तामा रहनुभएको माइलो दाजु मनोज उप्रेतीले बताउनहुन्छ । नेपाल ल्याउनको लागि त्यस बेलामा जमर्न प्रहरी समक्ष २ लाख ३४ हजार हर्जना तिर्नुपरेको मनोज उप्रेतीले बताउनुभयो ।

नेपाल आइसकेपछि राजनले घरमा फोन पनि गर्नुभएको थियो । त्रिभुवन विमानस्थलमा ओर्लिएपछि राजनले माइला दाजु मनोज उप्रेतीलाई फोन गरेर किन लिन नआएको भनेर पनि सोध्नुभएको थियो । मनोजले आफू खेतमा काम गरिरहेकाले आउन नभ्याएको बताउनु पनि भयो ।

‘त्यसपछि भाइले दिदी कल्पना पाठकको घरमा बसेर भोलि आउँछु भनेको थियो तर चार वर्ष भयो मरे बाँचेको थाहा छैन’, माइला दाजु मनोजले आँखभरि आँसु पार्दै भन्नुभयो ।

कल्पनाका अनुसार राजन त्यो रात उहाँको घरमा बस्नुभएको थियो । ‘त्यो रात बसेर भोलिपल्ट बिहान जर्मनीको पैसा पनि छ, साटेर आउँछु भनेर घरबाट निस्केको हो’, कल्पनाले भन्नुभयो, ‘त्यसपछि न यहाँ आयो, न त घर धुनिवेशी नै गयो ।’

राजन उप्रेती

राजन बेपत्ता भएदेखि घरपरिवार सबैतिर चिन्ता छाएको छ । ‘नयाँ वर्षको दिन घर आउँछु भनेको थियो तर आएन’ आमा राधिका उप्रेती भन्नुहुन्छ, ‘मेरो छोरा, तिमी जहाँ भए पनि आउ, तिम्रो मुख हेरेर मर्ने धोको छ ।’
राधिकाका आँखा आँशुले भरिएका हुन्छन् । आँखाभरि आँशु पार्दै उहाँ भन्नुहुन्छ, ‘ तिमी बेपत्ता भएदेखि नरोएको दिन छैन । पैसा ठूलो कुरो होइन छोरो यहीँ दुःख सुख गरेर बसौँला ।’

भाइ बेपत्ता भएपछि दाइ मनोजले प्रहरी कार्यालयमा पनि निवेदन दिनुभएको छ । तर अहिले सम्म कुनै अत्तोपत्तो भएको छैन । अस्पतालमा बेवारिसे शव तथा मानिस भेटियो भनेपछि दाजु मनोज उप्रेती कतै आफ्नै भाइ पो हो की भन्दै दगुर्दै अस्पताल पुग्नुहुन्छ ।

केहि गर्दा पनि कतैबाट भाइको खबर नआएपछि दाजु मनोज उप्रेती पनि चिन्तामा हुनुहुन्छ । भाइको खोजी गर्नको लागि झाँक्रीलाई पनि हेराउनु भएको छ । एक पटक जसरी भए पनि जहाँ भए पनि घर आउनको लागि दाजु मनोज उप्रेतीले आग्रह गर्नुभएको छ ।

परिवारले राजन उप्रेतीको खोजी गरीदिन आप्रवासी श्रोत केन्द्र धादिङमा पनि निवेदन दिनुभएको छ । राजन उप्रेतीको खोजीको लागि आप्रवासी श्रोत केन्द्र धादिङले सरोकारवाला निकाय सँग समन्वय गरेर काम गरीरहेको सुरक्षित आप्रवासन सामी परियोजनाका कार्यक्रम संयोजक दिनेश दुवाडीले जानकारी दिनुभयो ।

अन्तिम अपडेट: पुस ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्