मनकामना मन्दिरसँगै केबलकार २८ गतेदेखि खुल्ने

मंसिर २३, २०७७ मंगलबार १७:३१:२४ | किरण लोहनी

गोरखा – गाेरखाको मनकामना मन्दिर मङ्सिर २८ गतेदेखि खुल्ने भएको छ । कोरोना भाइरस सङ्क्रमणको जोखिमका कारण मन्दिर गएको चैत ७ गतेदेखि बन्द गरिएको थियो ।

मनकामना क्षेत्र विकास समितिको मङ्गलबार बसेको बैठकले आवश्यक स्वास्थ्य सुरक्षाको मापदण्ड र कार्यविधि तयार पार्दै भक्तजनका लागि मन्दिरको पूजाआजा सुरु गर्ने निर्णय गरेको हो । तर तत्कालका लागि भने पञ्चबली, लाखबत्ती बाल्ने जस्ता ठूला पूजाआजा भने गर्न नदिने निर्णय भएको क्षेत्र विकास समितिका कार्यकारी निर्देशक लेविन्द्र गुरुङले बताउनुभयो ।

मन्दिरमा दर्शन र पूजाआजा गर्न आउने भक्तजनले नेपाल सरकारले तय गरेको स्वास्थ्य सुरक्षाका मापदण्ड भने अनिवार्य पालना गर्नुपर्ने छ । दर्शन गर्न आउने भक्तजनलाई प्रवेश विन्दुमै ज्वरो नाप्ने र अन्य सामान्य स्वास्थ्य परिक्षणको व्यवस्था गरिनेछ भने व्यक्तिगत विवरण पनि सङ्कलन गरिनेछ ।

समूहगत रूपमा आएकाहरूको हकमा एक जनाले सबैको विवरण भर्नुपर्ने गरी कार्यविधि बनाइएको कार्यकारी निर्देशक गुरुङले जानकारी दिनुभयो । ‘हामीले सकेसम्म परिचयपत्रसहित आउन आग्रह गर्दछौँ’, उहाँले भन्नुभयो, ‘६० वर्षमाथिका भक्तजनलाई लाइनमा नराख्ने गरी दर्शन गर्ने व्यवस्था मिलाउने छौँ ।’

भक्तजनहरूका अतिरिक्त मन्दिरका पुजारी र क्षेत्र विकास समितिका कर्मचारीहरूको पनि बिहान र बेलुका दैनिक दुई पटक स्वास्थ्य जाँचको व्यवस्था गरिने उहाँको भनाइ छ । मन्दिर परिसरमा हात धुने ठाउँको व्यवस्थापन गर्दै भौतिक दुरी कायम हुने गरी दर्शन गर्ने प्रबन्ध मिलाउने काम सुरु भइसकेको गुरुङले जानकारी दिनुभयो ।

मनकामना मन्दिरसँगै मनकामना केबलकार पनि मङ्सिर २८ गतेबाटै सञ्चालन हुने भएको छ । ‘क्षेत्र विकास समितिको बैठकमा केबलकारका प्रतिनिधिहरूलाई पनि बोलाएका थियौँ’, कार्यकारी निर्देशक गुरुङले भन्नुभयो, ‘नाै महिनादेखि बन्द रहेको केबलकार सञ्चालनको प्राविधिक काम सकेर २८ गतेदेखि नै सञ्चालन गर्ने तय भएको छ ।’

सरकारले कोरोना सङ्क्रमणको जोखिम बढ्दै गएपछि सुरुमा धार्मिक स्थलहरूमा २५ जनाभन्दा बढी भेला हुन नपाउने निर्णय गरेको थियो । त्याे निर्णय कार्यान्वयनमा समस्या देखिएपछि मनकामना केबलकार र मन्दिर बन्द गरिएको थियो । भक्तजनलाई दर्शनका लागि बन्द गरिए पनि मनकामना मन्दिरको नित्य पूजा भने सञ्चालन हुँदै आएको छ ।

अन्तिम अपडेट: मंसिर १, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण लोहनी

उज्यालोका गोरखा सम्वाददाता किरण लोहनी गोरखाको च्वाइस एफएममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्