सरकारकाे चेतावनी : काेराेनाकाे नयाँ 'भेरिएन्ट' का कारण स्वास्थ्य प्रणालीले थेग्नै नसक्ने अवस्था आउन सक्छ

‘अस्पताल भर्ना हुने सङ्क्रमितमध्ये १० प्रतिशतभन्दा धेरै बालबालिका’

 बैशाख १, २०७८ बुधबार १८:१४:६ | उज्यालो सहकर्मी
unn.prixa.net

काठमाण्डाै – अस्पताल भर्ना हुने कोरोना भाइरसका सङ्क्रमितमध्ये १० प्रतिशतभन्दा धेरै बालबालिका रहेका छन् । गएको २४ घण्टामा कोरोना सङ्क्रमण पुष्टि भएकामध्ये ५२ जना १७ वर्षमुनिका किशाेरकिशाेरी तथा बालबालिका रहेका स्वास्थ्य तथा जनसङ्ख्या मन्त्रालयले जनाएको छ । 

यस्तै मङ्गलवार (हिजो) ४८ जना १९ वर्षमुनिका बालबालिकामा काेराेना सङ्क्रमण पुष्टि भएको थियो । यो तथ्याङ्कले नेपालमा कोरोना जोखिम अत्यन्तै संवेदनशील अवस्थामा पुगेको इपिडिमियोलोजी तथा रोग नियन्त्रण महाशाखाका निर्देशक डाक्टर कृष्ण पौडेलले बताउनुभयो । 

स्वास्थ्य मन्त्रालयको नियमित पत्रकार सम्मेलनमा डाक्टर पौडेलले कम उमेरमा सङ्क्रमण पुष्टि र अस्पताल भर्ना हुने दर दुवै बढेकोले कतै हाम्रो स्वास्थ्य प्रणालीले धान्नै नसक्ने अवस्थामा पुग्ने त हैन ! भन्ने चिन्ता बढेको बताउनुभयो । 

कान्ति बाल अस्पतालका निर्देशक प्राध्यापक डाक्टर आरपी बिच्छाले अस्पताल भर्ना हुनेमध्ये १० देखि १८ प्रतिशत सङ्क्रमित बालबालिका रहेको भन्दै यसले चिन्तित बनाएको बताउनुभयो ।

यस्तै इपिडिमियोलोजी तथा रोग नियन्त्रण महाशाखाका निर्देशक डा. पौडेलले अस्पताल भर्ना हुनेहरूमा ५० प्रतिशतभन्दा धेरै ५० वर्षमुनिका रहेका भन्दै यसअघिको अवस्था भन्दा फरक रहेको र बढी जटिल अवस्थाको सङ्केत रहेको बताउनुभयो । 

नेपालमा पछिल्लो समयमा फैलिएको कोरोना भाइरस बेलायत र भारतमा देखिएका नयाँ 'भेरिएन्ट' पनि रहेको भदै निर्देशक पौडेलले यी भेरिएन्टहरूको सङ्क्रमण र मृत्युदर दुवै उच्च रहेको बताउनुभयो । नयाँ भेरिएन्टले कम उमेर समूहकालाई समेत गम्भीर अवस्थामा पुर्‍याउने भएकोले बच्नका लागि थप सावधानी अपनाउनुपर्ने उहाँले बताउनुभयो ।

अहिले विद्यालय र सार्वजनिक यातायातमा बढी जोखिम देखिएकाले ती ठाउँमा बढी सावधानी अपनाउन पनि डा. पौडेलले बताउनुभयो ।   

अन्तिम अपडेट: बैशाख २०, २०७८

तपाईको प्रतिक्रिया