सिन्धुपाल्चाेक : इन्द्रावती र मेलम्चीमा आएकाे बाढीमा हराएकामध्ये एक जनाकाे शव भेटियाे

असार २, २०७८ बुधबार १६:४५:६ | किरण थापा

सिन्धुपाल्चोक – सिन्धुपाल्चोकको इन्द्रावती र मेलम्ची खोलामा आएको बाढीमा हराएकामध्ये एक जनाको शव भेटिएको छ भने आठ जना हराइरहेका छन् । बाढीमा बगेर हराएकाहरू जीवितै भेटिने सम्भावना कम भएको स्थानीयवासीले बताएका छन् । बाढीमा फसेकामध्ये ४३ जनालाई सुरक्षाकर्मीले उद्धार गरेका छन् । केहीलाई उद्धार गर्न हेलिकप्टरको प्रयोग गरिएको छ ।

हेलम्बु र पाँचपोखरीका फरक दुई नदीबाट उर्लिएको बाढीले इन्द्रावती करिडोरमा मानवीय क्षतिसहित ठूलो क्षति गरेको छ । बाढीले सयौँ घरटहरा, कृषि फर्म, सवारी साधन, सडक लगायत संरचना बगाएको हो । बाढीले मेलम्ची नगरपालिकाको सिटी पार्कको चिह्नसमेत नराखी बगाइदिएको छ । १२ करोड लगानीमा निर्माणाधीन सिटी पार्क उद्घाटनकाे तयारीमा थियो ।

सिन्धुपाल्चोकको सदरमुकाम चौतारा र प्रमुख व्यापारिक केन्द्र मेलम्ची जोड्ने पक्की पुल बाढीले बगाएको छ । बाढीले हेलम्बुको नाकोते पुल, मेलम्ची खानेपानीको आयोजनाको हेडवक्स स्थलमा पनि क्षति पुर्‍याएकाे छ ।

हिजो खोलामा बाढी आएदेखि बन्द भएको विद्युत् आपूर्ति अझै पनि सञ्चालन हुन सकेको छैन । सञ्चार विच्छेद हुँदा मेलम्ची बजारमाथिको अवस्था र क्षतिबारे यकिन हुन नसकेको जिल्ला प्रहरी कार्यालय सिन्धुपाल्चोकले जनाएको छ ।

पर्यटकको प्रमुख आकर्षण रहेको इन्द्रावती र मेलम्ची करिडोरका कराेडौँ लगानीका ट्राउट माछा फार्म सबै बगाएको छ । करिडोर नजिक रहेका रिसाेर्टका भवनसहित सबै सामग्री इन्द्रावतीमा विलय भएको पीडित द मेलम्ची भ्यु रिसोर्टका सञ्चालक लक्ष्मण गौतमले बताउनुभयो ।

बाढी हिजो बेलुका ६ बजेदेखि बढेको हो । घाम हुँदै बाढी आएकाले स्थानीयले थाहा पाएकाले मानवीय क्षति कम गराउन सके पनि धेरै संरचना बाढीको सिकार भए । मेलम्चीको ह्योल्मो बसपार्क पूरै डुबाउँदा सवारी साधन र बसपार्कमा रहेका होटलहरूको निसानासमेत देखिँदैन ।

मेलम्ची खानेपानी आयोजनाको मुहान क्षेत्र हेलम्बु हुँदै आएको बाढीले हेलम्बु गाउँपालिकाको तिम्बु र चनौटे बजार पनि डुबानमा परेको छ । आयोजनामा फसेका ३७ जना कामदारलाई सेनाको हेलिकप्टरबाट उद्धार गरिएको छ ।

एक सय ४५ जनाको ज्यान जाने गरी २०७१ सालमा गएको जुरे पहिरोपछि सिन्धुपाल्चोकमा बर्सेनि जस्ताे विपत्ति आइरहेका छन् ।

अन्तिम अपडेट: कात्तिक ३०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण थापा

किरण थापा सिन्धुपाल्चाेकका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्