खोटाङ – ‘बालिका बचत’ कार्यक्रम सुरु गरेपछि खोटाङको हलेसी तुवाचुङ नगरपालिकामा नियमित गर्भजाँच गराउने र बर्थिङ सेन्टरमा गएर सुत्केरी गराउनेको संख्या बढेको छ ।

बालिकामैत्री नगरपालिका बनाउने उद्धेश्यले नगरपालिकाले चालु वर्षदेखि ‘बालिका बचत’ कार्यक्रम सुरु गरको थियो । यो कार्यक्रमको प्रभावले अहिले नगरपालिकामा यो वर्षको ११ महिनामा ९० प्रतिशत गर्भवतीले बर्थिङ सेन्टर वा स्वास्थ्य संस्था गएर बच्चा जन्माएको उपमेयर बिमला राईले बताउनुभयो ।

यो कार्यक्रम अन्तर्गत नगरपालिकाले गएको साउन १ गतेदेखि यता जन्मिएका हरेक छोरीको नाममा खाता खोल्ने र ३ वर्षको उमेर पुग्दासम्म वार्षिक ४ हजारका दरले खातामा रकम जम्मा गर्ने व्यवस्था गरेको छ । यो सुविधा पाउन गर्भावस्थामा आमाले चार पटक अनिवार्य गर्भजाँच गरेको, स्वास्थ्य संस्थामै गएर सुत्केरी गराएको वा स्थानीय स्वास्थ्य संस्थामा सुत्केरी हुन नसकेको अवस्थामा अन्यत्र रेफर भएर छोरीलाई जन्म दिएको हुनुपर्ने प्रावधान छ ।