महोत्तरी - महोत्तरीको गौशाला नगरपालिका-६ फुल्काहामा रहेको श्री माध्यमिक विद्यालय भेडियाहीकाे कक्षाकाेठाभित्र नालाको पानी पस्दा लाखौँको क्षति भएको छ । 

गएराति वर्षातको पानी कक्षाकोठाभित्र पस्दा पाँच लाख मूल्य बराबरको शैक्षिक सामग्री भिजेर नष्ट भएको विद्यालयले जनाएको छ । 

प्रधानाध्यापक शैलेन्द्र ठाकुरले दिएको जानकारी अनुसार विद्यालयको कोठाभित्र पानी पस्दा ८ वटा कम्प्युटर बिग्रिएको छ भने मोनिटर, प्रोजेक्टर, फोटोकापी मेसिनमा क्षति पुगेको हो । बालविकासको कक्षाकोठाभित्र नालाको पानी पस्दा चकटी, कार्पेट, खेल सामग्री लगायतका शैक्षिक सामग्रीमा क्षति पुगेकाे प्रधानाध्यापक ठाकुरले जानकारी दिनुभयो । घटनाको सम्बन्धमा वडा कार्यालय, नगरपालिकाको कार्यालय र विद्यालय व्यवस्थापन समितिलाई जानकारी गराइ सकेको ठाकुरले बताउनुभयो । 

नालाकै कारण वर्षेनि विद्यालयमा क्षति हुने गरेकाले नालाको उचित निकासको लागि आफूले चाँडै नै पहल गरिने वडाअध्यक्ष नथुनी राउतले बताउनुभयो । चाँडै नै वडा कार्यालयले विद्यालय लगायतका आसपासका क्षेत्रमा रहेको सहायक सडकहरुलाई समेत व्यवस्थित गरिने वडाअध्यक्ष राउतले जनाएको छ ।