धुर्कोट बन्यो गुल्मीकै पहिलो खरको छानामुक्त गाउँपालिका

‘बुढेसकालमा भए पनि ढुक्कसँग निदाउन पाइने भइयाे’

असार २९, २०७८ मंगलबार २०:२०:४७ | जनार्दन घिमिरे

गुल्मी – ‘बर्खा लाग्दा पानीको डर त हिउँद लाग्दा आगोको डर, ढुक्कसँग सुत्न खोज्दा खोज्दै पनि कैयौँ रात आँखा झपक्कसम्म नपारि उज्यालो हुन्थ्यो, छिमेकीका घरका छाना ढुङ्गा र टिनले रङ्गिँदा हामी गरिब भएर जन्मनुमा भाग्यलाई सरापी रहन्थ्यौँ तर आज त्यही भाग्य घुम्दै–घुम्दै घरको धुरीसम्म आइपुग्यो, सम्झँदा पनि कता–कता सपना जस्तो लाग्छ’, धुर्कोट गाउँपालिका ७ वाग्लाका ७३ वर्षीय गोरबहादुर विकले आफ्नो विगतलाई यसरी सम्झनुभयो ।

अहिले उहाँ मात्र हैन उहाँकी ६१ वर्षीया श्रीमती पार्वती पनि निकै खुसी हुनुहुन्छ । धुर्कोट गाउँपालिकाले पालिकाभित्र खरको छाना विस्थापित गरी जस्तापाताले घर चिटिक्क पारिदिएपछि गोरे र पार्वती जस्ता सयौँ विपन्न परिवारमा खुसी छाएको छ । बुढेसकालमा अब उहाँहरू जस्तालाई छानाबाट पानी चुहिएला कि भनेर बलेनी थाप्नुपर्दैन । ‘अब त बुढेसकालमा भए पनि ढुक्कसँग निदाउन पाइने भइयो’, जस्तापाताले घरको छानो छाएलगत्तै वृद्ध दम्पतीले भन्नुभयो ।

चार वर्षको अवधिमा धुर्कोट गाउँपालिकाले यसैगरी खरको छाना भएका घरमा जस्तापाता लगाएर पालिकालाई खरका छानामुक्त घर भएको घोषणा गरेको छ । ‘चुनावको समयमा जनतासँग मत माग्दै गर्दा गरेको वाचा चुनाव जितेपछि जनप्रतिनिधिको नाताले आफूहरूले गरेको वाचा आज आएर पूरा गरेका छौँ’, धुर्कोट गाउँपालिका अध्यक्ष भुपाल पोख्रेलले भन्नुभयो । धुर्कोटलाई समृद्ध बनाउनका लागि परेको पोख्रेलले बताउनुभयो ।

गुल्मीका १२ पालिकामध्ये धुर्कोट गाउँपालिका खरको छानामुक्त घर भएको पालिका घोषणा गर्ने पहिलो बनेको छ । यस पालिकामा अहिलेसम्म सुरक्षित आवास कार्यक्रम अन्र्तगत गाउँपालिका, सङ्घीय सरकार र प्रदेश सरकारबाट ६ सय ९८ र भूकम्पपछि निजी आवास पुनर्निर्माण अन्तर्गत निर्माण गरिएका पाँच सय ४७ गरी जम्मा १२ सय ४५ घरमा जस्तापाता लगाइएको धुर्कोट गाउँपालिका उपाध्यक्ष शिवबहादुर खत्रीले जानकारी दिनुभयो । उहाँका अनुसार ती घरका खरका छाना विस्थापित गर्नका लागि पालिका, प्रदेश र सङ्घीय सरकारबाट १९ करोड २९ लाख ९४ हजार रुपैयाँ खर्च भएको छ ।

पालिकाले आयोजना गरेको एक कार्यक्रममा जिल्ला समन्वय समितिका प्रमुख लक्ष्मण पराजुलीले धुर्कोट गाउँपालिकालाई खरको छानामुक्त पालिका घोषणा गर्नुभएको थियो । घोषणा कार्यक्रममा बोल्दै समन्वय समितिका प्रमुख पराजुलीले जनताले पालिका सरकारसँग ठूलो आशा र भरोसा गरेको भन्दै त्यसलाई कायम राख्दै यसै गरी खुसी बाँड्दै र साट्दै जानुपर्ने बताउनुभयो ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

जनार्दन घिमिरे

गुल्मीका क्रियाशील पत्रकार जनार्दन घिमिरे लामो समयदेखि उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्