लुम्बिनी प्रदेश : एमाले सर्वाेच्चमा, विपक्षी निगरानीमा

साउन २६, २०७८ मंगलबार ११:५५:५३ | भवानीप्रसाद पाण्डे

रुपन्देही - सर्वाेच्च अदालतले जनता समाजवादी पार्टी(जसपा)ले पदमुक्त गरेका तीन जना बहालवाला मन्त्रीको मुद्दामा अन्तरिम आदेश दिन अस्वीकार गरेपछि लुम्बिनी प्रदेशमा शंकर पोखरेल नेतृत्वको सरकार थप सङ्कटमा परेको छ । जसपाको ठाकुर पक्षका मन्त्रीहरु सन्तोष पाण्डे , विजय बहादुर यादव र कल्पना पाण्डे लम्साल पदमुक्त भएसँगै अब ८७ सदस्यीय लुम्बिनी प्रदेश सभा ८० सदस्यीय बनेको छ ।

प्रदेश प्रमुख अमिक शेरचनले आह्वान गरेको विशेष अधिवेशन रोक्न एमाले सांसद लीला गिरीले सोमवार सर्वाेच्च अदालतमा दिएको रिट निवेदनमा सर्वाेच्चले अन्तरिम आदेश दिएन भने पोखरेल नेतृत्वको सरकारको दिनगन्ती सुरु हुने देखिन्छ । रिटको आज प्रारम्भिक सुनुवाइका लागि पहिलो पेशी रहेको छ ।

यसअघि माओवादी केन्द्रले दधिराम न्यौपाने र दिनेश पन्थीलाई कारबाही गरेको थियो भने दीर्घ नारायण पाण्डे र अमर डाँगीले प्रदेश सभा सदस्यबाट राजीनामा दिनु भएको थियो ।

८० सदस्यीय प्रदेश सभामा सत्तारुढ एमालेसँग ३८ जना सदस्य मात्रै रहेका छन् । जुन प्रदेश सभाको बहुमत सदस्य सङ्ख्या ४१ भन्दा कम हो । विपक्षी गठबन्धनसँग नेपाली कांग्रेसका १९ माओवादी केन्द्रका सभामुख बाहेक १८ , जसपाका ३ र राष्ट्रिय जनमोर्चाका १ गरी ४१ सदस्य रहेका छन् । प्रदेश सरकारले नियमित अधिवेशनमार्फत ल्याएको आर्थिक वर्ष २०७८/७९ को बजेट संसदमा पारित नहुने देखेपछि एकाएक अधिवेशनको अन्त्य गर्दै अध्यादेशमार्फत बजेट ल्याएको छ ।

प्रदेश प्रमुख फेरिएर अमिक शेरचन आएपछि विपक्षी गठबन्धनले विशेष अधिवेशनको लागि समावेदन गरेअनुसार साउनको २७ गते प्रदेश सभामा पेस भएको अविश्वासको प्रस्ताव माथि छलफल गर्न विशेष अधिवेशन आह्वान भएको छ । यसअघि वैशाख ६ गते र २६ गते प्रदेश सरकार विरुद्ध दर्ता भएका अविश्वास प्रस्ताव छलफलका लागि प्रदेश सभामा लगिएको थिएन ।

संविधानको धारा १६८ को १ अनुसार भन्दै तत्कालीन प्रदेश प्रमुख धर्मनाथ यादवले मुख्यमन्त्रीको रुपमा शंकर पोखरेललाई शपथ गराएपछि विपक्षी गठबन्धनले विश्वासको मत लिएर बहुमत पुष्टि गर्न चुनौती दिँदै आएका थिए । सत्तारुढ एमालेले भने आफूसँग बहुमत रहेको दाबी गर्दै आएको छ । विपक्षी गठबन्धनले संविधानको धारा १६८ को २ अनुसार सरकार गठन हुनुपर्ने बताउँदै आएका छन् ।

यसैबीच प्रदेश सभाको संरचना फेरिएसँगै सांसदहरुको तानातान हुने सम्भावना बढेपछि सम्बन्धित पार्टीहरुले आफ्ना सदस्यहरुमाथि निगरानी बढाइरहेका छन् । माओवादी केन्द्रले आफ्ना सांसदलाई कपिलवस्तुको राजा पानीमा रहेको रिसोर्टमा राखेको छ । केही साथीहरु एकै ठाउमा बसेको भए पनि एमालेले आरोप लगाए जस्तो विपक्षी गठबन्धनका सबै सदस्यहरु एकै ठाउँमा नबसेको नेपाली कांग्रेसका प्रमुख सचेतक फकरुद्धिन खानले बताउनु भयो ।

माओवादी केन्द्रका सचेतक तुलाराम घर्तीले पनि केही साथीहरु एकै ठाउँमा बसेको भए पनि सबै होइन भन्नुभएको छ । केही दिनअघि मुख्यमन्त्री कार्यालयमा बिमला खत्री ओलीलाई बन्धक बनाइएको आरोप लागेको थियो । तर, प्रदेश सरकार र सत्तारुढ एमालेले त्यसको खण्डन गरेका थिए ।

अन्तिम अपडेट: कात्तिक २८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

भवानीप्रसाद पाण्डे

रुपन्देहीका उज्यालो सहकर्मी भवानीप्रसाद पाण्डे बुटवल एफएममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्