सुख त होइन दुःखकै पेसा : बाख्रापालनबाट कमाइ हुने आशा

भदौ २६, २०७८ शनिबार २०:२४:३३ | श्यामशितल परियार

लमजुङ – दुई दशकसम्म बंगुरपालन व्यवसाय गर्नुभयो लमजुङ श्रीमञ्ज्याङका कुलप्रसाद श्रेष्ठले । उहाँ गाउँमै सञ्चालन गरेको बंगुरपालन व्यवसायबाट राम्रो आम्दानी गर्न सफल पनि हुनुभयो । तर विभिन्न कारणले पछि त्यो व्यवसायलाई निरन्तरता दिन सक्नुभएन, उहाँले ।

‘२० वर्षसम्म बंगुर पालन गरियो । कमाइ राम्रो पनि भयो,’ उहाँले भन्नुभयो, ‘पछि विविध कारणले यसलाई निरन्तरता दिन सकिएन ।’

पानीको उचित व्यवस्थापन हुन नसक्नु, दानापानी बोक्न असहज भएकाले पनि लामो समयसम्म सञ्चालन गरेको बंगुरपालनलाई पछि निरन्तरता दिन नसकेको उहाँले बताउनुभयो ।

बंगुरपालन छोडी बाख्रापालन

बंगुरपालन छाडेपछि उहाँले निर्वाहमुखी ढंगले बाख्रा पालन गर्नुभयो । निर्वाहमुखी ढंगले सञ्चालन गरेको व्यवसायबाट जीवनस्तर उकासिने सम्भावना नदेखेपछि उहाँले यसैलाई व्यवसायमा बदल्ने सोच बनाउनुभयो । लगत्तै, घरपरिवारको सल्लाहमा उहाँले दोर्दी गाउँपालिका–३, श्रीमञ्ज्याङमै ‘नमूना कृषि फर्म’ दर्ता गरी व्यावसायिक बाख्रापालन सुरु गर्नुभयो । २०७५ सालबाट उहाँले व्यावसायिक रुपमा बाख्रापालन सुरु गर्नुभएको हो ।

उहाँले व्यवस्थित रुपमा बाख्राको खोर निर्माण गरी बाख्रा पाल्दै आउनुभएको छ । उहाँको फर्ममा अहिले सानाठूला गरी ७० को हाराहारीमा बाख्रा पालिएका छन् । फर्ममा ३५ वटा माउ बाख्रा, ५ वटा खसी, एउटा बोयर बोका र अन्य साना पाठापाठी रहेका छन् ।

उहाँको फर्ममा स्थानीय जातका साथै जमुनापारी, बिटल क्रस जातका बाख्रा रहेका छन् ।

तीन लाखको लगानीमा खोर निर्माण

व्यवस्थित रुपमा बाख्राको खोर निर्माण गरी बाख्रापालन गर्न सकेमा उत्पादन राम्रो हुने र राम्रो कमाउन सकिने उहाँ बताउनुहुन्छ । त्यसैले उहाँले लाखौँ रुपैयाँ खर्चेर व्यवस्थित बाख्राको खोर बनाउनुभएको छ ।
बाख्राको व्यवस्थित खोर निर्माणका लागि सरकारी निकायबाट उहाँले सहयोग समेत पाउनुभएको छ ।

गएको वर्ष भेटेरिनरी अस्पताल तथा पशु सेवा विज्ञ केन्द्रले खोर निर्माणमा १ लाख ५० हजार रुपैयाँ सहयोग गरेको थियो ।

‘विज्ञ केन्द्रको एक लाख पचास हजार र आफ्नो पनि एक लाख पचास हजार रुपैयाँ गरी तीन लाख रुपैयाँ खर्चेर बाख्राको खोर बनाइएको हो,’ उहाँले भन्नुभयो ।

बाख्रापालनबाट राम्रो आम्दानी

बाख्रापालनबाट राम्रो आम्दानी भइरहेको उहाँले बताउनुभयो । ‘सुरुवातको चरणमा बाख्रा खरीद र खोर निर्माणमा धेरै खर्च भयो,’ उहाँले भन्नुभयो, ‘बिस्तारै व्यवसाय विस्तार हुँदै गएको छ । आम्दानी राम्रो हुँदै गएको छ ।’

फर्मबाट गएको वर्ष मात्रै ३ लाख रुपैयाँ आम्दानी भएको उहाँले बताउनुभयो । दुःख, मेहनत बढि भएतापनि बाख्रापालनबाट राम्रो आम्दानी लिन सकिने उहाँले बताउनुभयो ।

‘सुख त होइन दुःखकै पेसा हो । व्यवस्थित रुपमा बाख्रा पाल्न सके यसबाट राम्रो कमाउन सकिन्छ । सजिलै जीवनस्तर चलाउन सकिन्छ,’ उहाँले भन्नुभयो ।

खेर गएको जमिनको पनि उपयोग हुने र घरगाउँमै बाख्रापालन गरी स्वरोजगार बनी राम्रो आर्जन गर्न सकिने उहाँले बताउनुभयो ।

‘राम्रो कमाउन सकिने आशा र विश्वासका साथ बाख्रापालन गरेको हुँ । राम्रो पनि भइरहेको छ । यसैलाई निरन्तरता दिने सोच छ,’ उहाँले भन्नुभयो, ‘फर्ममा बिस्तारै एक सय हाराहारीमा बाख्रा पुर्याउने लक्ष्य छ ।’

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्