आबुधावी डाइलग : नेपालमा सिकेको सीपलाई मान्यता दिने गरी संयन्त्र बनाउन गन्तव्य देशलाई नेपालकाे आग्रह

कात्तिक १०, २०७८ बुधबार १५:४५:८ | उमाकान्त पाण्डे

यूएई – श्रम, रोजगार तथा सामाजिक सुरक्षा मन्त्री कृष्ण कुमार श्रेष्ठ ‘किसान’ ले यूएईमा जारी आबुधावी डाइलगमा नेपालमा सिकेको सीपलाई मान्यता दिन गन्तव्य देशलाई आग्रह गर्नुभएको छ ।

संयुक्त अरब इमिरेट्स (यूएई)मा सोमबारदेखि जारी छैटौँ श्रम मन्त्री स्तरीय ‘आबुधावी डाइलग’ मा सहभागी मन्त्री श्रेष्ठले मंगलबार सम्बोधन गर्दै मन्त्री श्रेष्ठले कामदार पठाउने देशमा दिइने सीप तालिमलाई गन्तव्य देशमा मान्यता र त्यसका लागि आवश्यक संयन्त्र बनाएर अघि बढ्नु पर्ने भनाई राख्नुभएको हो ।

श्रम मन्त्री श्रेष्ठले उठाएको यो विषयमा सहभागी सबैजसो देशका प्रतिनिधिले जोड दिएको यूएईका लागि नेपाली राजदूत कृष्णप्रसाद ढकालले उज्यालोलाई जानकारी दिनुभयो ।

यस्तै मन्त्री श्रेष्ठले श्रमिक आयात गर्ने मध्य पूर्वी अरबी खाडी मुलुक र कामदार उपलब्ध गराउने एसियाली मुलुकबीच थप समन्वय आवश्यक रहेको बताउनु भएको छ । मन्त्री श्रेष्ठले आप्रवासी कामदारको हकहित, सुरक्षाका विषयमा थप समन्वय, लगानी र डिजिटल मञ्चको प्रयोग गर्नुपर्ने कुरा उठान गर्नुभएको छ ।

यूएईको श्रम तथा मानव संसाधन मन्त्रालयले कामदार पठाउने देश र कामदार आयात गर्ने देशबीचको सम्बन्ध र भावी योजना बारे छलफल गर्न आबुधावी डाइलगको आयोजना गरेको हो । बिहीवारसम्म चल्ने डाइलगमा नेपालको तर्फबाट मन्त्री श्रेष्ठसहित श्रम सचिव सूर्यप्रसाद गौतम र उपसचिव डा.थानेश्वर भुसाल सहभागी हुनुहुन्छ ।

यसैबिच आबुधावी डाइलगमा सहभागी हुन यूएई आएको टोलीले बुधबार साँझ आबुधावीमा रहेको नेपाली दूतावासमा यहाँ रहेका संघसस्थाका प्रतिनिधिसँग भेटघाट तथा छलफल गर्ने कार्यक्रम रहेको छ । टोली बिहीवार दुबईमा जारी दुबई एक्पो २०२० को अवलोकन गर्ने कार्यक्रम तय भइसकेको दूतावासले जनाएको छ ।

आबुधावी डाइलगमा श्रमका लागि कामदार पठाउने सदस्य मुलुकहरू नेपालसहित अफगानिस्तान, बङ्गलादेश, भारत, इन्डोनेसिया, पाकिस्तान, फिलीपिन्स, श्रीलङ्का, थाइल्यान्ड र भियतनामका प्रतिनिधिको सहभागिता रहेको छ । त्यस्तै कामदार ल्याउने देशका सदस्य मुलुकहरू यूएईसहित बहराइन, ओमान, कुवेत, कतार, साउदी अरब, यमन र मलेसियाका प्रतिनिधि सहभागी भएका छन् ।

डाइलगमा संयुक्त राष्ट्र अन्तरगत आइएलओ तथा अन्य आप्रवासी कामदार र उनीहरूको अवस्थाबारे काम गर्दै आएका विभिन्न अन्तर्राष्ट्रिय संस्थाहरू समेत सहभागी भएका छन् । सन् २००८ को जनवरी २१ बाट सुरु भएको आबुधावी डाइलगमा सुरुबाटै नेपालले सहभागिता जनाउँदै आएको छ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

उमाकान्त पाण्डे

उज्यालाे सहकर्मी उमाकान्त पाण्डे युएईमा बसेर पत्रकारिता गर्नुहुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्