कोप-२६ : नेपालले जलवायु न्याय र क्षतिपूर्तिको कुरा उठाउने

कात्तिक १४, २०७८ आइतबार ८:२५:५७ | उज्यालो सहकर्मी

काठमाण्डाै - स्कटल्यान्डकाे ग्लास्गोमा आजदेखि सुरु हुने जलवायु परिवर्तनसम्बन्धी अन्तर्राष्ट्रिय सम्मेलनमा नेपालले पनि आफ्नो मुद्दा उठाउँदैछ ।

जलवायु परिवर्तनका कारण विभिन्न विपद् सामना गर्न बाध्य भएको नेपालले गरिब देशहरूलाई परेको हानि-नोक्सानीको क्षतिपूर्ति दिनुपर्ने आवाज उठाउने भएको हो । यस्तै पग्लिरहेको हिमालका कारण नागरिकले भोग्नुपरेको समस्या समाधानका लागि नेपालले विश्व समुदायसँग सहकार्य गर्न आह्वान गर्ने भएको छ ।

नेपालसहित अति कम विकसित देशहरुले जलवायु परिवर्तनको असर न्यूनीकरण, अनुकूलन तथा जलवायुजन्य घटनाबाट हुने हानि-नोक्सानी न्यूनीकरण तथा क्षतिपूर्तिको मुद्दालाई मुख्य रुपमा उठाउन लागेका हुन् । नेपालको तर्फबाट सम्मेलनमा प्रधानमन्त्रीस्तरबाट १२ वर्षपछि सहभागिता हुन लागेको हो ।

सम्मेलनमा जलवायु परिवर्तनका कारण उत्पन्न परिस्थितिहरूसँग अब अनुकूलनले मात्र नथेग्ने गरी क्षतिहरू हुन थालेका र तिनको निराकरण गर्ने क्षमता र स्रोत आफूहरूसँग नभएकाले त्यसका लागि विश्व समुदायसँग आह्वान गरिने वन तथा वातावरण मन्त्रालयले जनाएको छ ।

संयुक्त राष्ट्र सङ्घको जलवायु परिवर्तनसम्बन्धी निकायको प्रतिवेदनअनुसार खासगरी कार्बन उत्सर्जनका कारण बढ्दो तापक्रमले मनसुनजस्ता मौसमी प्रणाली खलबलिएको औंल्याएको छ । यसको असर नेपालको मौसमी प्रणालीमा पनि परेको छ र यसवर्ष बाढी पहिरोबाट धनजनको ठूलो नोक्सानी भएको छ ।

प्रधानमन्त्री शेरबहादुर देउवाले जलवायु सम्मेलनमा नेपालमा हुने विपद् जन्य जोखिम न्यूनीकरण तथा क्षतिको व्यवस्थापन गर्ने काममा सहकार्य गर्न आह्वान गर्ने तयारी गर्नुभएको छ । यसैगरी नेपालले हिमालय क्षेत्रमा हिउँ पग्लने र हिमताल विस्फोटनको जोखिमबारेमा पनि विश्वको ध्यानाकर्षण गराउने वन मन्त्रालयले जनाएको छ । सम्मेलनमा नेपालले पर्वतीय देशहरुहरू र अति कम विकसित देशको समूहमार्फत आफ्ना कुरा लागेको हो ।

अन्तिम अपडेट: पुस २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्